Сауда министрлігі қайта өңделген ауыл шаруашылығы өнімдерінің экспортын ілгерілететін болады

Сауда министрлігі тереңдетілген қайта өңдеу тауарларын қолдауға баса назар аудара отырып, экспортты дамыту жөніндегі жұмысты құрылымдайды. Бұл ретте назар АӨК тауарларына бағытталатын болады. Бұл туралы Үкімет отырысында сауда және интеграция министрі Арман Шаққалиев мәлімдеді.

«Ең алдымен Қытайға баса назар аударылады. Біз орта мерзімді келешекте дайын өнім экспортын 2,5 есеге арттырып, 12,5 млрд долларға жеткізу міндетін қойып отырмыз. 2023 жылдың қорытындысы бойынша ҚХР-ға шикізаттық емес тауарлардың экспорты 5 млрд долларды құрады. ЕАЭО және Орталық Азия елдерімен тауар айналымын ұлғайту бойынша тереңдетілген жұмыс жалғасады, шекара маңы саудасының қажетті инфрақұрылымы құрылады. Таяу Шығыс елдерінде жоғары сұранысқа ие тоңазытылған қой еті, құс еті және қосалқы өнімдер сияқты жоғары маржалық тауарларды жеткізуді ұлғайту пысықталуда. Біз үшін қазақстандық азық-түлік және органикалық өнімдерді сатып алуға дайын Еуропалық Одақ нарықтары да басым бағыт болып табылады», - деді Сауда министрлігінің басшысы.

Осы мақсатта тауашалық сауда ағындарын құрылымдайтын нарықтың кәсіби қатысушыларымен бірлесіп QazTrade негізінде сауда үдеткіші іске қосылады. Экспорттық өнімнің кепілдік берілген көлемін форвардтық сатып алуға аванстық төлемдерді көздейтін өнімді жеткізуге арналған ұзақ мерзімді келісімшарттар алдын ала жасалатын болады. Сауда министрлігі даму институттарын тарта отырып, ведомствоаралық үйлестіруді өз мойнына алады.

Сыртқы факторларға тәуелділікті азайту үшін экспортты қолдаудың қаржылық шаралары тереңдетілген тауарларды қолдауға бағытталған.

«QazTrade институтының негізінде жыл сайын 450-ден астам компания алатын сервистік шаралар шоғырланған. Соңғы үш жылда экспорттың өсуі тек өсімдік майлары мен тоң майлары бойынша - 2,2 есе, тыңайтқыштар – 1,7 есе, қой еті – 4,4 есе өсті. Біздің есептеулеріміз бойынша экспортты қолдауға жұмсалған 1 теңгеге 500 теңге экспорттық кіріс келеді. Бұл ретте сервистік тауарлар мен қызметтерді қолдаудың орташа жылдық көлемі шамамен 2,3 млрд теңгені (немесе 5 млн доллар) немесе шикізаттық емес экспорт көлемінің 0,02%-ын құрайды», - деп атап өтті Арман Шаққалиев.

Ол сондай-ақ мамыр айының басында ШҰАА-дағы (Үрімші) QazTrade сауда өкілдігі тіркелгенін хабарлады. Араб Әмірліктерінде ЭКСПО Дубай ұлттық павильонының аумағында Qazaq Trade House жұмыс істей бастады. Сондай-ақ, қазақстандық компаниялардың Қытайдың екі ірі көрмесіне қатысуы жоспарланған: Үрімші және Шанхай қалаларында.