ҚТЖ тауарларды тасымалдауды маусымдықты ескере отырып бағдарлау ұсынылды

Қазақстанда өнім экспортын ұлғайту үшін логистикалық шығындарды оңтайландыру және жүк тасымалының тиімділігін арттыру қажет. Осы мақсатта экспорттық әлеуетті дамыту жөніндегі Жол картасы әзірленді. Бұл туралы Үкімет отырысында сауда және интеграция министрі Арман Шаққалиев мәлімдеді.

«Өңделген өнімге, оның маусымдылығына назар аудара отырып, экспорттық тауарларды тасымалдау әдістемесі әзірленді және ұлттық теміржол операторының қарауына берілді. Қазақстандық өнімді тасымалдауды арзандату мақсатында экспорттық тауарға, бағыт пен маршрутқа басымдықпен «тиеп – төледі» қағидаты бойынша шығыстарды өтеу құралына тәсіл қайта қаралуда, бұл қолдау алу процесін жеделдетеді».- деді Арман Шаққалиев.

Ол биылғы жылы белсенді экспорттаушылар санын 120 компанияға ұлғайту және шикізаттық емес тауарлар экспортының 6%-ға өсуін қамтамасыз ету міндеті тұрғанын атап өтті. Экспортты қолдауға баса назар АӨК тауарларына аударылады.

Премьер-Министр Олжас Бектеновтың айтуынша, шикізаттық емес экспорттың құрылымын жоғары қайта бөлу жағына сапалы өзгерту қажет. Өткен жылы жалпы барлық салалар бойынша шикізаттық емес тауарлардың импорты 21,5%-ға өскен кезде, экспорты 5,7%-ға төмендеді.

«Отандық өнімді өткізу нарығын кеңейту қажет. Ол үшін шетелде экспортты неғұрлым тиімді ілгерілету қажет. Сондықтан біздің сауда өкілдеріміз кейбір серіктес елдерге жіберіледі. Алайда, бұл жұмыс баяу жүріп жатыр және оны айтарлықтай жандандыру қажет. Мәселен, өткен аптада ҚХР Мемлекеттік Кеңесі Премьер-Министрінің орынбасары екеуміз Қытаймен сауда қатынастарын кеңейту мәселелерін жан-жақты талқыладық. Бұл бағыттың келешегі зор», - деді Үкімет басшысы.

Ол Сауда, Сыртқы істер және Қаржы министрліктеріне 1 шілдеге дейін Бейжіңге сауда өкілдерін жіберуді және ШҰАА-да сауда өкілдігін ашуға толық дайындықты қамтамасыз етуді тапсырды.

Сонымен қатар, қазіргі уақытта отандық тауар өндірушілерді қолдау бойынша шаралар кешені пысықталуда. Премьер-министр орта және жоғары қайта бөлу тауарларының экспортын қолдауға баса назар аударуға шақырды.

Ол сондай-ақ Сауда және интеграция министрлігіне басқа да мүдделі мемлекеттік органдармен және ұйымдармен бірлесіп бір ай ішінде қазақстандық тауарлар экспортының нарықтарын әртараптандыру мәселесін пысықтауды тапсырды.1 тамызға дейін шикізаттық емес экспорт көлемін одан әрі ұлғайту жөніндегі нақты іс-қимыл жоспарын енгізу қажет.

Сондай-ақ, экспорттаушылар үшін кедергілерді азайту бойынша тұрақты жұмыс жүргізу, әкімшілік және кедендік рәсімдерді цифрландыруды жүргізу қажет.

Көлік министрлігіне көліктік-логистикалық инфрақұрылымды жетілдіру жөнінде шаралар қабылдау тапсырылды.