Түркістан облысының фермерлері үшін су бағасы 38%-ға дейін төмендетілді

Түркістан облысының аграрийлері үшін суармалы судың бағасы 38%-ға дейін төмендеді. Бұл туралы Су ресурстары және ирригация министрлігінің баспасөз қызметі хабарлады.

Жыл басында аграрийлердің өтініші бойынша "Қазсушар" филиалдары фермерлермен делдалдарсыз тікелей шарттар жасай бастады. Нәтижесінде су бағасы төмендеді.

«Егер бұған дейін топырақты жууға арналған судың құны 1 гектар үшін 6000-нан 7000 теңгеге дейін болса, биыл ол 1 гектар үшін 4282 теңгені құрайды. Осылайша, Түркістан облысының фермерлері үшін суармалы су құнының төмендеуі орта есеппен 28%-дан 38%-ға дейін құрады», - деп атап өтті Су ресурстары және ирригация министрлігінде.

Биылғы жылы «Қазсушар» Түркістан облысы бойынша филиалы аграрийлермен су беру туралы 6160 шарт жасасқаны хабарланды. Мақтаарал және Жетісай аудандары бойынша 111,1 мың га алқапқа су беру туралы 2825 шарт, Шардара ауданы бойынша – 41,3 мың га егіс алқабын суаруға 1280 шарт жасалды.

«Суару кезеңіне дайындық үшін «Қазсушар» тұтынушылармен тікелей шарттар жасасады, бұл делдалдарды алып тастауға мүмкіндік береді. Тиісінше, қызметтердің құны да арзандайды. Жалпы,  «Қазсушар» суару кезеңінде 19 мыңнан астам аграрийлермен су беру туралы шарттарға қол қоюды жоспарлап отыр», – деп атап өтті су ресурстары және ирригация министрі Нұржан Нұржігітов.

Сонымен қатар, ведомствода суару маусымына дайындық туралы айтылды. Министрліктің мәліметінше, Түркістан облысының Созақ ауданына Шу өзені арқылы 1 млрд текше метр су жіберілген.

Шардара су қоймасынан 4,8 млрд текше метр су жиналды. Бұған дейін Өзбекстанмен «Достық» каналы арқылы 922 млн текше метр су беру туралы уағдаластыққа қол жеткізілген болатын.

Сондай-ақ, өңірде Шардара ауданында тік дренаждың 302 ұңғымасына жөндеу жұмыстары жүргізілуде, Қазсушар қарамағындағы 600 шақырымнан астам канал тазартылды.