Қазақстанда жер комиссиясы қайта форматталды
Қазақстанда жерді қайтару жөніндегі Комиссия ҚР Президентінің тапсырмасынан кейін атауы мен жұмыстың форматын өзгертті. Қазір ол Ауыл тұрғындарының қажеттіліктері үшін жерді қайта бөлуді, сондай-ақ жер ресурстарын ұтымды пайдалануды бақылау жөніндегі республикалық комиссия деп аталады. Бұл туралы Үкіметтің баспасөз қызметі хабарлады.
Комиссия отырысында жаңа форматтағы басты мәселе адал жер пайдаланушылардың мүдделеріне нұқсан келтірмеу үшін пайдаланылмаған, сондай-ақ бұзушылықпен берілген жерлерді мемлекетке қайтару рәсімін оңайлату болды.
«Ұсыныстар әзірлеу үшін Ауыл шаруашылығы министрлігі арнайы комиссияның іс-қимыл алгоритмін әзірледі, ол жергілікті жерлерде салық төлеуді, инвестициялар тартуды және өңірлерде тиісті ауыл шаруашылығы аумақтарын дамытуды қамтамасыз ететін қолданыстағы ауыл шаруашылығы өндірушілері мен ауыл шаруашылығы өнімдерін қайта өңдеушілер үшін құқықты жалғастыру мәселелерін реттеумен айналысатын болады», - деп түсіндірді Үкіметте.
Арнайы комиссия екі тізімді қалыптастырады: адал және жосықсыз жер пайдаланушылар. Адал пайдаланушыларды іріктеу критерийлері келесідей: жерді мақсатына сай пайдаланады, салық төлейді, инвестиция тартады, сол аймақта тұрады және оны дамытуға инвестиция салады. Жосықсыз - өз жер учаскелерін пайдаланбайды немесе заңнаманы бұза отырып пайдаланады.
Вице-премьер Серік Жұманғарин барлық нюанстарды пысықтау үшін Әділет және Қаржы министрліктерінің мамандарының қатысуымен ұсынылған алгоритмді пысықтауды тапсырды.
Бұдан басқа, комиссия отырысында тиісті заңнамалық өзгерістер енгізу арқылы шекаралық елді мекендердің тұрғындары үшін жер учаскелерін беру мүмкіндігі қаралды. Бұл мәселені бұрын Үкіметтегі Кеңесте депутат Ерлан Саиров көтерген болатын. Атап айтқанда, ШҚО-да шекаралық аумақта тұрғындар басқа елдерге экспорттау үшін жоңышқа өсіруге дайын. Жер кодексіне сәйкес шекара белдеулерінде мал жаюға және шөп шабуға рұқсат етіледі, бірақ жерді жеке меншікке және уақытша пайдалануға беруге жол берілмейді.
Серік Жұманғарин осы аумақтардағы қауіпсіз режимге қойылатын барлық талаптарды ескере отырып, шекаралық өңірлердің – Абай, Жетісу, Алматы, Жамбыл және Шығыс Қазақстан облыстарының тұрғындарына жер учаскелеріне құқықтар беру мүмкіндігіне толық талдау жүргізуді тапсырды.
Үкіметтің мәліметінше, 2024 жылдың басынан бастап Жер ресурстарын басқару комитетінің аумақтық бөлімшелері жер пайдаланушыларға қатысты 2 млн га жалпы алаңда 1302 жоспардан тыс тексеру жүргізді, 1,4 млн га алаңда жер заңнамасын бұзушылықтарды жою туралы 953 ұйғарым енгізілді. Бұрын берілген тапсырмаға сәйкес, биыл 254 мың гектар аумақта ауыл шаруашылығы мақсатындағы жерлерді игеру жұмыстары басталды. Жыл басынан бері қайтару жоспарланған 2 млн гектар ауыл шаруашылығы алқаптарының 1,5 млн гектары қайтарылды.