Жамбыл облысында сібір жарасы көмілген жерлерге жақын жер бөлінді
Жамбыл облысында сібір жарасының таралуына байланысты мәселелерді жер саласының мониторингі барысында өңірдің Сыбайлас жемқорлыққа қарсы қызметі анықтады.
Санитарлық ережелерге сәйкес сібір жарасын көму орындары 1-сыныпқа жатады және олар үшін кемінде 1000 метр санитарлық-қорғау аймағы белгіленеді. Алайда, мониторинг барысында жерді бөлу кезінде аталған талаптарды жергілікті атқарушы органдар елемегені белгілі болды, ал жер қатынастары саласының мамандары жердің санитарлық-қорғау аймағында екенін тексерген жоқ.
«Қазіргі уақытта Жамбыл облысында 189 сібір қорымы бар екенін ескере отырып, Департаменттің ұсынымдары негізінде ветеринария саласындағы уәкілетті органмен келісім бойынша жерді бөлу тәжірибесі енгізілді. Сондай-ақ, мемлекеттік жер қорына Талас ауданында сібір жарасы жерленген жерлерге жақын орналасқан 27 га төрт жер телімі қайтарылды», - деп хабарлады Сыбайлас жемқорлыққа қарсы қызметте.