Бүкіл бақылау тарихында 2023 жыл Қазақстандағы ең жылы жыл болды
2023 жылы Қазақстандағы ауаның орташа жылдық температурасы 1941 жылдан бастап барлық бақылау кезеңінде рекордтық көрсеткіштерге жетті. Аномалия климаттық нормаға қатысты +2,58°C құрады. Әлемде өткен жыл ресми түрде аспаптық бақылаулар тарихындағы ең жылы деп танылды. Орташа жаһандық температура өнеркәсіпке дейінгі деңгейден 1,45°C жоғары болды (1850-1900). Бұл туралы Қазгидромет хабарлайды.
2023 жылы Қазақстанның барлық облыстарында, әсіресе көктемде, жазда және күзде өте жоғары температура тіркелді. Бірқатар аймақтарда температура +40°C-тан асып, жылу толқындары 30-дан астам, кей жерлерде 60 күннен астам уақытқа созылды. Ең жоғары температура + 46°C Батыс Қазақстан облысындағы Қаратөбе станциясында тіркелді.
Дегенмен, 2023 жылы Қазақстанның батыс және оңтүстік өңірлеріндегі төрт метеостанцияда тәуліктік ең төменгі температура рекордтары орнатылды.
Атмосфералық ылғалға келетін болсақ, жауын-шашынның таралуы біркелкі болмады. Күз айтарлықтай артық ылғалмен (нормадан 149,1%) ерекшеленді, ал көктем әсіресе Түркістан (нормадан 53%) және Қостанай (нормадан 56%) облыстарында құрғақ болды. Сәуірден шілдеге дейін аумақтың көп бөлігі жауын-шашын тапшылығын бастан өткерді.
Сондай-ақ батыс, солтүстік, орталық және шығыс өңірлерде және Түркістан облысында жауын-шашынның жылдық ең жоғары рекордтық мәндерінің жағдайлары тіркелді. Батыс Қазақстан облысындағы Каменка метеостанциясында шілде айындағы ең көп жауын-шашын 203 мм болды, бұл 1959 жылы орнатылған 133,1 мм бұрынғы рекордтан асып түсті.
«Қазақстандағы климаттық өзгерістер географиялық орналасуына және үлкен территориясына байланысты аймақтар мен жыл мезгілдері бойынша біркелкі емес көрінеді. Бұл өзгерістер республиканың биофизикалық жүйелеріне, шаруашылық қызметі мен әлеуметтік саласына теріс және оң әсер етуі мүмкін. Мысалы, солтүстік өңірлердегі вегетациялық кезеңнің ұзағырақ болуы ауыл шаруашылығына пайдалы әсер етуі мүмкін, ал оңтүстік және батыс өңірлердегі аптап ыстық толқынының ұзақтығының ұлғаюы халықтың денсаулығына қауіп төндіреді және энергетикалық жүйеге жүктемені арттырады», - деп атап өтті Қазгидрометте.