Тоқаев Азық-түлік корпорациясына фермерлерден астық сатып алуды тапсырды

Азық-түлік корпорациясы арқылы фермерлерден нарықта қолайлы бағаларды ұстап тұру үшін жеткілікті көлемде астық сатып алуды ұйымдастыруды Қазақстанның президенті Қасым-Жомарт Тоқаев Ауыл шаруашылығы қызметкерлерінің бірінші форумы барысында тапсырды.

Ол биылғы жылы дәнді дақылдардың өнімділігі гектарына 16 центнерді құрағанын, бұл орташа көпжылдық мәндерден едәуір жоғары екенін атап өтті. Кейбір өрістерден гектарынан 40 немесе одан да көп центнер жиналды, олардың сапасы мен желімшесі деңгейі өте жоғары (32%).

«Енді жиналған өнімді сақтау және оның бағасының құлдырауына жол бермеу міндеті тұр. Үкіметке Азық-түлік корпорациясы арқылы фермерлерден нарықта қолайлы бағаларды ұстап тұру үшін жеткілікті көлемде астық сатып алуды ұйымдастыруды тапсырамын. Астық егетін өңірлерде сақтау қуатын босату мақсатында Ауыл шаруашылығы және Көлік министрліктері астықтың басқа облыстарға ауысуын жедел қамтамасыз етуі тиіс. Мұнда өңірлер әкімдерінің үйлесімді жұмысы қажет», - деді президент.

Сондай-ақ, ол мол егіннің кепілі - егіс және егін жинау жұмыстарын уақтылы қаржыландыру екенін атап өтті.

«Жыл сайын фермерлер төлемдердің кешігуіне байланысты егін егуде қиындықтарға тап болды. Сондықтан менің тапсырмам бойынша көктемгі егіс жұмыстарына жеңілдікті несиелер ағымдағы жылдың желтоқсан айынан бастап қолжетімді болады. Нәтижесінде фермерлер отынды, қосалқы бөлшектерді, басқа да қажетті тауарлар мен қызметтерді алдын ала сатып ала алады», - деп атап өтті Тоқаев.

Президент салаға жеке инвестицияларды тарту қажеттігін еске салды.

«АӨК-ті мемлекеттік субсидиялауды біртіндеп қысқартып, банктердің ауыл шаруашылығына жеңілдікпен несие беруін ынталандыру қажет. Отандық қаржы институттары агроөнеркәсіп кешендеріне «ұзақ» және қолжетімді ақшалай қаражат алуға мүмкіндік беруі тиіс», - деді Тоқаев.