Петропавлда құны 37 млрд теңге болатын донаттар өндірісі іске қосылады

Петропавлда нан-тоқаш өнімдері мен донаттар шығаратын Bakerton компаниясы зауытының құрылысы басталды. Зауыттың іске қосылуы 2026 жылға жоспарланған, деп хабарлады Солтүстік Қазақстан облысы әкімінің баспасөз қызметі.

Зауыттың жобалық қуаты жылына 13 мың тонна өнімді құрайды, ресейлік компания өндіріске 37 млрд теңге инвестиция салады. Кәсіпорында 379 жұмыс орны құрылады.

Зауыт Qyzyljar АЭА аумағында салынуда. Өңір әкімдігінде атап өткендей, бұл жобаны іске асыру жергілікті экономиканы дамытуда, елдің азық-түлік қауіпсіздігін нығайтуда және экспорттық әлеуетті арттыруда маңызды қадам болады.

Естеріңізге сала кетейік: Bakerton брендімен өнімдерді әлемдегі ең ірі 100 кондитерлік өндірушілердің қатарына кіретін ресейлік «Хлебпром» компаниясы шығарады. Донаттардан басқа, Хлебпром нан, торт, піспенан және басқа да өнімдер шығарады. СҚО әкімдігі бұған дейін ресейлік компаниялар өңірде ауыл шаруашылығы өнімдерін өңдеуге қызығушылық танытып отырғанын хабарлаған болатын.