Қазақстанда ауыл шаруашылығы кооперациясын қалай ынталандырады

Қазақстанда ауыл шаруашылығы кооперациясын дамыту үшін заңнамалық және экономикалық ынталандырулар жасалды. Ауыл шаруашылығы мақсатындағы жерлерді бөлу кезінде кооперативтердің артықшылығы болады, ауылдардағы бизнесті жеңілдікпен шағын несиелендіру бағдарламасы және басқа да жобалар қолданылады. Бұл туралы премьер-министр Олжас Бектенов Сенат депутаттарының сауалына берген жауабында айтты.

Үкімет басшысы ауыл шаруашылығы кооперативтеріне бірігу жеке шаруа қожалықтары мен шағын шаруашылықтарды табысты дамыту үшін ең оңтайлы нұсқа екенін атап өтті. Соның ішінде олар өндірісті ұлғайту және өнімді кепілді өткізу үшін АӨК-нің орта және ірі субъектілерімен біріге алады.

Кооперацияны ынталандыруға, атап айтқанда, «Ауыл аманаты» жобасы бағытталған, оның шеңберінде 100,5 млрд теңге сомасына 15,5 мың микрокредит берілді. Оның ішінде 9,7 млрд теңгеге 442 ауыл шаруашылығы кооперативі қаржыландырылды. Пайыздық мөлшерлемесі 2,5% болатын микрокредиттер мал шаруашылығын, өсімдік шаруашылығын, ауыл шаруашылығы кооперациясын, сондай-ақ ауыл шаруашылығы емес бизнесті дамытуға беріледі.

Бұдан басқа, 2024 жылы ауыл шаруашылығы өндірісін жүргізу үшін уақытша өтеулі жер пайдалану құқығын беру жөніндегі байқауларға қатысатын ауыл шаруашылығы кооперативтеріне қосымша балл беруді көздейтін жайылымдарды пайдалану мәселелері бойынша заңнамаға түзетулер енгізілді. Бұл кооперативтерге ауыл шаруашылығы мақсатындағы жерлерді алу кезінде басқа ауыл шаруашылығы өндірушілерімен салыстырғанда артықшылық береді.

«Қазіргі уақытта ауыл шаруашылығы кооперативтерінің мемлекеттік қолдау алу үшін басқа ауыл шаруашылығы өндірушілерімен тең мүмкіндіктері бар», - деп атап өтті Олжас Бектенов.

Сонымен қатар, елде ауылдық аумақтарды дамыту Тұжырымдамасы және халықтың табысын 2029 жылға дейін арттыру бағдарламасы іске асырылуда. Барлық қолдау шаралары ауылдық елді мекендерді дамытуға және ауыл тұрғындарының кетуін азайтуға бағытталған.

2024 жылы «Бәйтерек» холдингінің еншілес және тәуелді компаниялары ауылдық кәсіпкерлікті қолдауға 585 млрд теңге бөлді. Сонымен қатар, 2024 жылдан бастап «Дипломмен ауылға» жобасы аясында тұрғын үй сатып алуға бюджеттік несие мөлшері 2 мың - 2,5 мың АЕК-ке дейін ұлғайтылды.