Қазақстанда зәйтүн екпелерінің ауданы 100 гектарға дейін ұлғаяды
Қазақстанда зәйтүн өсіру және өңдеу жобасы жүзеге асырылуда. 2025 жылдың соңына қарай зәйтүн екпелерінің ауданы 100 гектарға жетеді деп жоспарлануда. Бұл туралы ҚР Ауыл шаруашылығы министрлігінің баспасөз қызметі хабарлады.
Жоба 2023 жылы басталды. Қазақстандық QVM Technology, Ordabasy Group және «Ервира» компаниялары грузиялық Olive Georgia компаниясымен бірлесіп Түркістан, Маңғыстау облыстары мен Жетісу облыстарында зәйтүн көшеттерін тәжірибелік отырғызуды бастады. 6 мыңнан астам көшет отырғызылды, олардың өміршеңдігі 99,7% құрады. Алғашқы өнім бес жылдан кейін алынады деп күтілуде.
2024 жылдың көктемінде жоба кеңейтіліп, қосымша Испания мен Түркиядан зәйтүн көшеттері отырғызылды.
ҚР ауыл шаруашылығы министрі Айдарбек Сапаров Global Olive Corporation компаниясының президенті Георгий Сванидземен Қазақстанда зәйтүн ағаштарын өсіру және зәйтүн майын өндіру жөніндегі жобаны іске асырудың негізгі кезеңдерін талқылады.
«Министрліктің алдында қайта өңделген өнімнің үлесін 70%-ға дейін ұлғайту міндеті тұр, ал зәйтүн саласын дамыту АӨК үшін стратегиялық маңызға ие. Біз барлық қажетті жағдайларды жасауға және осы жобаны іске асыруда жан-жақты қолдау көрсетуге дайынбыз», - деп атап өтті Айдарбек Сапаров.
Георгий Сванидзе зәйтүн өсіру жобасы елдің ауыл шаруашылығының дамуына айтарлықтай әсер ететініне сенім білдірді.
«Біздің мақсатымыз - Қазақстанның зәйтүн саласын дамыту. Жалпы, біз көшеттердің санын миллионға дейін ұлғайтуға ниеттіміз, жас агрономдарды технологияларға үйретуге, өз сарапшыларымызды әкелуге дайынбыз. Жоба аясында зәйтүн майын шығаратын зауыт, көшет шығаратын тәлімбақ салу жоспарлануда», - деді Global Olive Corporation президенті.
Кездесу соңында өзара түсіністік және ынтымақтастық туралы Меморандумға қол қойылды. Сондай-ақ, жобаны табысты іске асыру үшін мерзімдер мен іс-шараларды айқындайтын Жол картасы әзірленетін болады.
Ауыл шаруашылығы министрлігінің мәліметінше, жобаның құны 20 млн долларды құрайды. Келешекте ол жылына 150 мың тонна зәйтүн өнімін қамтамасыз етуге мүмкіндік береді, оның ішінде шамамен 30 мың тонна зәйтүн майы өндірілетін болады.