Қонаевта құны 8 млрд теңге болатын май мен ұн өндірісі іске қосылады

Қонаев қаласында бір мезгілде үш жаңа зауыт салумен «Капшагай бидай өнімдері» ЖШС өндірістік алаңын жаңғырту жобасы іске асырылуда. Нысанға өсімдік майы, ұн және жемдік ұн өндіретін зауыт кіреді, деп өңірлік әкімдіктің баспасөз қызметі хабарлады.

Жоба 8 млрд теңге көлемінде жеке инвестициялар есебінен жүзеге асырылады. Кәсіпорын Қазақстанның ішкі нарығын қамтамасыз етіп қана қоймай, өнімді Қытайға экспорттайтын болады.

«Қазіргі уақытта белсенді құрылыс жұмыстары жүргізілуде: темір жолдар жаңғыртылуда, қоймалар, терминалдар мен өндірістік корпустар салынуда. Жобаға 200-ге жуық жұмысшы тартылды, қосымша 2 га жер сатып алынды, ол бойынша жеке жоба дайындалуда. Кәсіпорынды іске қосу ағымдағы жылға жоспарланған. Экспорттың жылдық көлемі 1 млн тоннаға жетеді деп күтілуде», - деді кәсіпорын бас директорының орынбасары Ринат Тоқпанов.

Зауыт қаптамамен қамтамасыз етуде толығымен автономды болады - оның аумағында қап өндіруге арналған білдектер орнатылған. Қазір нысанда 250 адам жұмыс істейді, жаңа қуаттарды іске қосқаннан кейін тағы 300-ге жуық тұрақты жұмыс орны құрылады.