Қазақстанда ветеринариялық зертханалардың 87%-ы халықаралық стандарттар бойынша аккредиттелмеген
АӨК-тегі ветеринариялық, фитосанитариялық басқа қызметтердің жұмысындағы кемшіліктерді Жоғары аудиторлық палата жүргізген аудит анықтады. Атап айтқанда, елдегі ветеринарлық зертханалардың 87%-дан астамы халықаралық стандарттарға сәйкес аккредиттелмегені анықталды. Ал 101 шекаралық пункттің 24-і фитосанитариялық бақылаумен қамтамасыз етілмеген. Бұл туралы ЖАП баспасөз қызметі хабарлады.
ЖАП ақпараты бойынша, тексеру іс-шараларын Ауыл шаруашылығы министрлігі, оның жекелеген комитеттері мен ведомстволық бағынысты ұйымдары, Азық-түлік корпорациясы, ҰАҒБО, QazBioPharm ұлттық холдингі, бейінді ЖОО және өңірлік әлеуметтік-кәсіпкерлік корпорацияларды қамтыды.
Агроөнеркәсіптік кешеннің дамуын тежейтін бірқатар проблемалық факторлар, оның ішінде дамудың бағдарламалық құжаттары арасындағы сәйкессіздік, өзін-өзі қамтамасыз ету индикаторларын сақтамау және азық-түлік қорларының жеткіліксіз мониторингі анықталды.
«Негізгі өнімдер бойынша өзін-өзі қамтамасыз ету деңгейі әлі де 80%-ға жетпейді және қолданылатын есептеу әдістемесі тұтынудың физиологиялық нормаларын ескермейді. Республикада азық-түлік қорларын есепке алу мен бақылаудың автоматтандырылған жүйесі әлі енгізілмеген, бұл осындай тауарлардың болуы мен қозғалысы туралы деректердің дұрыс еместігіне әкеледі», - деп атап өтті ЖАП.
Сондай-ақ аудит барысында 396 млн теңгеден астам сомаға ветеринариялық препараттарды сатып алу рәсімдерін бұзу жағдайлары анықталды.
Сонымен қатар, мемлекеттік аудиторлар ауыл шаруашылығының білім сыйымдылығының өсу қарқынының төмендігін атап өтті: 2023 жылға қарай бұл көрсеткіш жалпы ішкі өнімнің 0,26%-ына ғана жетті. Ғылыми зерттеулердің нәтижелерін практикаға жеткіліксіз енгізу саланы жаңғыртуды тежейді.
Аудит 179 млн теңгеден астам бюджет қаражатын тиімсіз жоспарлауды, сондай-ақ 66,2 млрд теңгеге тиімсіз пайдалануды анықтады. Аудиторлық іс-шараның қорытындысы бойынша аудит объектісі шаралар қабылдады, нәтижесінде мемлекет активтеріне 4,4 млрд теңге өтелді.
«ЖАП барлық анықталған бұзушылықтар мен мәселелерді жою үшін қажетті ұсыныстар мен тапсырмалар әзірледі. Олар жұмыс тәртібімен ҚР Үкіметіне және аудит объектілеріне жіберілді», - деп ведомствода хабарлады.