ЕАДБ Қазақстандағы қойма инфрақұрылымына инвестицияларды ұлғайтуға ниетті

Еуразиялық даму банкі Қазақстан мен Орталық Азия елдеріндегі қойма инфрақұрылымын дамытуға инвестицияларды айтарлықтай арттыруды көздеп отыр, бұл ретте халықаралық көлік дәліздері бойындағы мультимодальды хабтар мен тарату орталықтарын дамытуға баса назар аударылады. Бұл туралы ЕАДБ баспасөз қызметі хабарлады.

Өзбекстан бойынша ЕАДБ директоры Алексей Рогачевский Central Asia Warehouse Summit (CAWS 2026) барысында атап өткендей, өңірдің қойма инфрақұрылымы еуразиялық логистикалық бағыттарды дамытудың негізгі элементі бола алады. Қойма инфрақұрылымын кеңейту «Еуразиялық тауар өткізу желісі» мегажобасы шеңберінде жүзеге асырылатын болады.

ЕАДБ Қазақстан мен Өзбекстанға Орталық Азияның қойма логистикасының неғұрлым қарқынды дамып келе жатқан нарықтары ретінде ерекше назар аударады. Атап айтқанда, Өзбекстан электрондық коммерцияны дамыту, транзиттік рөлді күшейту және белсенді мемлекеттік қолдау есебінен қазіргі заманғы қойма қуаттылығына сұраныстың тұрақты өсуін көрсетуде.

«ЕАДБ үшін Өзбекстан тек қатысушы ел ғана емес, сонымен қатар болашақ Еуразиялық тауар өткізу желісінің негізгі орталықтарының бірі болып табылады. Қазақстанмен бірлесіп ол Орталық Азияның негізгі тарату хабына айналуы мүмкін. Біз мұнда «онжылдықтың мүмкіндігін» көріп отырмыз және осы инфрақұрылымды қалыптастыруда зәкірлік инвестор болуға дайынбыз», - деді Алексей Рогачевский.

Ол Қазақстан мен Өзбекстан Еуразиялық логистика мен таратудың негізгі тораптары ретінде қалыптасып, аймақтың Қытай мен Еуропа, Ресей және Оңтүстік Азия/Таяу Шығыс, сондай-ақ Оңтүстік Кавказ және Каспий бассейні нарықтары арасындағы байланыстырушы буын ретіндегі рөлін күшейтетінін атап өтті.

Банк интеграциялық әсері бар инфрақұрылымдық жобаларды - ең алдымен Солтүстік - Оңтүстік халықаралық көлік дәліздері мен Транскаспий бағытының бойында орналасқан объектілерді қаржыландыруға ниетті. Мультимодальды логистикалық хабтар мен «құрғақ порттар», сондай-ақ тоңазытқыш және агрологистикалық орталықтарды қоса алғанда, мамандандырылған қойма объектілері басым бағыттар болып табылады.

2030 жылға қарай банк өңірдің жиынтық сыртқы сауда айналымының 20%-дан астам ұлғаюын күтуде.