Жетісу облысында 3,2 мың гектар жер ауыл шаруашылығы айналымына енгізіледі
Жетісу облысында суармалы су шығынын азайту үшін тоғыз су шаруашылығы нысанын (Ақсу, Көксу, Қаратал, Сарқан, Ескелді аудандары мен Талдықорған қаласында) қайта жаңарту және күрделі жөндеу жұмыстары жүргізілуде. Жобалар аяқталғаннан кейін 34,3 мың га жерді суару жақсартылады, ал 3,2 мың га жаңа жер ауыл шаруашылығы айналымына енгізіледі. Бұл туралы облыс әкімінің баспасөз қызметі хабарлады.
Құрылыс жұмыстары жүргізіліп жатқан нысандардың бірі «ҚазСуШар» РМК филиалының Ескелді өндірістік учаскесіне жататын «Алмалы» су қоймасы болып табылады. Мердігер ұйым жалпы ұзындығы 2,6 км магистральдық арнаның темірбетон науаларын ауыстырады. Бүгінгі күні жұмыстар ұзындығы 1 км учаскеде орындалды, қалған бөлігі жыл соңына дейін аяқталады.
«Жаңа темірбетон науалары сүзу нәтижесінде пайда болатын су шығынын едәуір азайтады және суды ауылшаруашылық жерлеріне шығынсыз жеткізуге мүмкіндік береді. Магистральдық каналды қайта құруға қарамастан, су қолданыстағы жүйе бойынша үздіксіз жеткізілуін жалғастыруда. Бұл су қоймасының жалпы сыйымдылығы 5,5 млн текше метрді құрайды. Ағымдағы жылы су қоймасында 3,8 млн текше метр су жиналды, бүгінгі күні оның қоры 2,184 млн текше метрді құрайды. Бұл көлем су пайдаланушылар алдындағы барлық міндеттемелерді толық орындау үшін жеткілікті. Ағымдағы жылы 23 шаруа қожалығымен шарттар жасалды, су 223 га жерге беріледі. Біздің басты міндетіміз – суару маусымының ең қарбалас кезеңінде сумен қамтамасыз етудің үзілуіне жол бермеу. Қазіргі уақытта су көлемі тұрақты, суармалы су жеткілікті, ол ауыл шаруашылығы өндірушілеріне үздіксіз беріледі», – деді Ескелді аудандық өндірістік учаскесі басшысының орынбасары Шыңғыс Мұқатов.
Қазіргі уақытта бұл су қоймасы 312 гектар суармалы жерді сумен қамтамасыз етеді, ал болашақта бұл көрсеткішті 600 гектарға дейін арттыру мүмкіндігі пайда болады.
Әкімдіктің ақпараты бойынша, ағымдағы жылы Жетісу облысында 511,8 мың гектар алқапқа ауыл шаруашылығы дақылдары егілді, оның 200,2 мың гектары суармалы жерлерді құрайды. Өңір суармалы сумен алты су қоймасы және 12 жер үсті су көздері (өзендер) есебінен қамтамасыз етіледі.