Ғалымдар көктемгі егін егу кезінде аграршыларға онлайн кеңес береді

«Ұлттық аграрлық ғылыми-білім беру орталығының» ғалымдары елдегі төтенше жағдайға байланысты Facebook, Instagram, Telegram және басқа да интернет ресурстары арқылы фермерлер үшін қашықтан кеңес беруді ұйымдастырды. Бұл туралы Ауыл шаруашылығы министрлігі хабарлады.

30 наурыздан бастап ҰАҒБО және ҚазҰАУ,  егіншілік және өсімдік шаруашылығы, мақта шаруашылығы, жеміс шаруашылығы, күріш шаруашылығы, мал шаруашылығы және ғылыми-зерттеу институттарымен бірлесіп 55 мың фермер үшін көктемгі егін егу  жұмыстарына дайындық мәселелері бойынша онлайн-кеңес өткізді.

Фермерлер элиталық тұқыммен қамтамасыз ету мәселесі, тыңайтқыштарды дұрыс таңдау және оны қосу, паразиттер мен ауруларға қарсы агрохимиялық іс-шаралар жүргізу, қолдан ұрықтандыру технологияларын енгізу, жердің құнарлылығын жақсарту және тағы басқа да сұрақтар қойды. Онлайн кездесуден кейін ғалымдар жеке ұсыныстар мен жазбаша сұрақтарға жауап беріп, фермерлердің электронды пошталарына жіберді.

«Қазір егіс науқаны кезінде фермерлерге қолдау көрсету өте маңызды іс.  Бүгінгі қиын жағдайда біз қазіргі заманғы технологиялардың көмегімен Қазақстан фермерлеріне кеңес беруді және көмектесуді жалғастыруды шештік. ҰАҒБО -ның барлық еншілес ұйымдары, ғылыми-зерттеу институттары мен орталықтары, тәжірибе станциялары мен шаруашылықтары фермерлерге өздерінің ұсыныстарын әлеуметтік желілер мен мессенджерлер арқылы ұсынады», — деп хабарлады Ұлттық аграрлық ғылыми-білім беру орталығы  басқармасының төрағасы Толеутай Рахимбеков.

Оның хабарлауы бойынша,  егіс жұмыстары аяқталғанға дейін ҰАҒБО Қазақстан аграршылары үшін 230 онлайн-кеңес өткізетін болады.