ҚР-да ТЖ режимі тоқтатылды

Қазақстанда 19 қаңтарда сағат 00.00-ден бастап жаппай тәртіпсіздіктер мен террористердің шабуылына байланысты 5 қаңтарда енгізілген төтенше жағдай режимінің қолданылуы тоқтатылады. Бұл туралы ҚР Президентінің баспасөз хатшысы Берік Уәли мәлімдеді.

Оның айтуынша, 19 қаңтарда түн ортасынан бастап Нұр-Сұлтан және Алматы қалаларында, сондай-ақ Алматы, Атырау, Жамбыл, Қызылорда және Маңғыстау облыстарында режимнің қолданылуы тоқтатылады. Бұған дейін Президент басқа өңірлердегі төтенше жағдайдың мерзімінен бұрын алып тастаған болатын.

"Бүкіл ел қалыпты жағдайға оралуда. ТЖ кезеңіне енгізілген коменданттық сағат және басқа да уақытша шектеулер алынуда. Халықтың бірлігі мен тұтастығының, құқық қорғау органдары мен армияның жанкешті жұмысының арқасында Қазақстанның барлық аумағында тәртіп пен тыныштық қалпына келтірілді. Елімізде әрдайым бейбітшілік пен амандық орнасын!",- деп жазды Берік Уәли Facebook-те.

Төтенше жағдай бірқатар шектеулерді қарастырды, олардың ішінде: көлік құралдарының кіруі мен шығуын қоса алғанда, қозғалыс еркіндігіне шектеулер; құжаттарды тексеру, жеке тексеру, заттар мен көлік құралдарын тексеру. Коменданттық сағат енгізілді, қару-жарақ, оқ-дәрілер, жарылғыш заттар, этил спирті мен алкоголь өнімдерін сатуға тыйым салынды, жеке тұлғалардан қару-жарақ пен оқ-дәрілерді уақытша алып қою көзделді. Коменданттық сағат ережелерін бұзған жеке тұлғалар ұсталуы керек болды.

Айта кету керек, еркін қозғалу мүмкіндігі фермерлер үшін алдағы егіс жұмыстарына дайындық кезінде маңызды.