Жапония Қазақстаннан зығыр майының импортын 3 мың тоннаға дейін ұлғайтады

Жапондық «Джатеко» компаниясы Қазақстаннан зығыр майының импортын жылына 3 мың тоннаға дейін арттыруды жоспарлап отыр. Сондай-ақ, мақсары және мақта майларын жеткізу талқылануда, деп хабарлады ҚР Сауда және интеграция министрлігінің баспасөз қызметі.

«Джатеко» өкілдері ҚР сауда бірінші вице-министрі Айжан Бижановамен кездесуде Жапонияда қазақстандық зығыр майына сұраныс күтілгеннен едәуір жоғары болғанын мәлімдеді: жапондық тұтынушылар бұл өнімнің сапасын жоғары бағалады.

Жапонияның зығыр майына жыл сайынғы қажеттілігі шамамен 10 мың тоннаға жетеді, бұл Қазақстаннан келетін ағымдағы жеткізілімдерден едәуір асып түседі. Өсіп келе жатқан сұранысты қамтамасыз ету үшін «Джатеко» жақын арада қазақстандық зығыр майының импортын жылына 3 мың тоннаға дейін ұлғайтуды жоспарлап отыр.

Сондай-ақ, жапон нарығы үшін мақсары және мақта майлары қызығушылық тудырады, олардың жылдық қажеттілігі сәйкесінше 4 мың және 5 мың тоннаны құрайды. «Джатеко» компаниясы мақсары майын жеткізу көлемін 1 мың тоннаға дейін және мақта майын 2,5 мың тоннаға дейін жеткізу ниеті туралы мәлімдеді, бұл қазақстандық өндірушілер үшін жаңа мүмкіндіктер ашып, елдер арасындағы ынтымақтастықты нығайта алады.

Кездесудегі басты тақырыптардың бірі логистика мәселелері болды. Айжан Бижанова көлік бағыттарын оңтайландыру және жапондық серіктестер үшін күту уақытын қысқарту мақсатында ҚР Көлік министрлігімен және ҚТЖ ұлттық компаниясымен жұмыс кеңестерін өткізуді ұсынды.

2024 жылдың тоғыз айының қорытындысы бойынша Қазақстан өсімдік майлары экспортының айтарлықтай өскенін көрсетті. Оның ішінде Жапонияға 122,4 мың доллар сомаға 93 тонна май экспортталды, бұл өткен жылдың сәйкес кезеңімен салыстырғанда 4,5 есе көп. Зығыр және күнбағыс майлары Қазақстанға әлемдік нарықта сенімді орынды қамтамасыз ете отырып, экспорттың негізгі бөлігін құрайды. Жалпы, Қазақстанның осы сектордағы тауар айналымының жалпы көлемі  321,9 млн долларға жетті, оның 297,5 млн доллары экспортқа тиесілі.