Қазақстанда майлы дақылдар 2020 жылы 2,6 млн тонна болады

Бүгін Үкімет отырысында сөз сөйлеген ҚР Ауыл шаруашылығы министрлігінің басшысы Сапархан Омаров18 миллион тонна көлемінде астық жиналатындығын айтты. Биыл 2,6 миллион тонна майлы дақылдар жинау жоспарланып отыр.

«18 миллион тонна дәнді дақылдарды жинау жоспарланып отыр, бұл ішкі нарықты қамтамасыз етуге және экспортқа шығаруға жеткілікті. Майлы дақылдардың жалпы өнімі 2,6 млн тонна көлемінде болады деп күтілуде, бұл өткен жылмен салыстырғанда 100 мың тоннаға артық», - деді С.Омаров.

Ауыл шаруашылығы министрлігі 2020 жылғы 30 наурыздағы «Ауыл шаруашылық дақылдарының өнімділігі мен өсімдік шаруашылығы өнімін өсіруге арналған субсидиялау ережесін бекіту туралы» бұйрыққа өзгерістер енгізгенін атап өткен жөн. Аталған құжат майлы дақылдарды өңдейтін қазақстандық кәсіпорындарға субсидия беруді көздейді: 1 тонна майлы дақылға 100%.

Сондай-ақ, Сапархан Омаров картоп пен көкөніс өндірісінің көлемі сәйкесінше 4 миллион тоннаға және 6,8 миллион тоннаға дейін ұлғайтылатынын хабарлады.

Ауыл шаруашылығы министрлігінің басшысы ішкі нарықты өсімдік шаруашылығы өнімдерімен қамтамасыз ету мақсатында егістік көлемі 439,2 мың гектарға кеңейтілгенін атап өтті. Дәнді дақылдардың жалпы егіс көлемі 22,7 миллион гектарға дейін ұлғайтылды.

Сонымен қатар, тұрғындарды алмамен қамтамасыз ету үшін 2 мың гектарға алма бақтарды отырғызу жоспарланып отыр, олар 68 мың тонна өнім алуға мүмкіндік береді. Бүгінгі күні 1700 гектар жер дайындалды.

Сонымен бірге, нарықты мал шаруашылығы өнімдерімен қамтамасыз ету үшін мал басы көбейтілуде: 2020 жылдың 8 айында ірі қара мал 5%, ұсақ мал - 3,2%, жылқы - 9% өсуі байқалады.