Қызылорда облысында бір аптадан кейін қарбыз жинау науқаны басталады

Қызылорда облысында 25 маусымнан бастап алғашқы қарбыздарды жинау  жоспарланып отыр. Бұл туралы облыс әкімінің баспасөз қызметінен хабарлады.

Биыл Жаңақорған ауданының Жайылма ауылындағы 12 шаруа қожалығы 470 гектардан астам жерге қарбыз отырғызды. Егін жинау 25 маусымнан бастап кезең-кезеңімен жүргізіледі. Ал шілде айында жаппай өнім жинау науқаны басталады.

Жинаған өнімдерін тасымалдау және өткізу жайын шаруалар қазірден бастап уайымдап, ойластыруда. Облыстық ауыл шаруашылығы басқармасының хабарлауынша, өнімдерді  өткізу үшін солтүстік өңірлермен келісімдер жасалған. Сондықтан да Қызылорда тауарларын кедергісіз тасымалдау және сату шаралары қарастырылған, сондай-ақ арнайы сауда орындары бөлінген.

 Сонымен қатар, басқа аудандарға тасымалдау үшін арнайы рұқсат беріледі. Бірақ бұл экспортталатын өнімдерге міндетті түрде карантиндік сертификаттардың болуын және тасымалдау мен сату кезінде барлық санитарлық шаралардың қатаң сақталуын талап етеді.

Сондай-ақ, Қызылорда қаласында жергілікті өнімді сататын арнайы орындар белгіленген.

Естеріңізге сала кетейік, Түркістан аграршылары ТМД елдеріне қарбыз экспорттай бастаған болатын.