АШМ жазғы маусым кезінде көкөніс бағасы төмендейді деп болжауда

Егін жинау науқаны басталғандықтан Қазақстан Ауыл шаруашылығы министрлігі көкөністер бағасының төмендеуін күтуде. Бұл туралы департаменттің баспасөз қызметінен хабарлады.

Ауыл шаруашылығы министрлігі азық-түлік тауарларының 32 санаты бойынша аймақтардың аталған өнімдермен қамтамасыз етілуін бақылау үстінде.

«Ағымдағы жылдың 24 шілдесіндегі ақпарат бойынша, республикада 713,8 мың тонна азық-түлік қоры бар, оның ішінде тұрақтандыру қорларында - 34 мың тоннаға жуық өнім, ал өндірістік кәсіпорындарда - 210 мың тоннаға жуық, қоймаларда - 155 мың тонна, бөлшек сауда желілерінде - 315 мың тоннадан астам бар», - деді брифингте ҚР Ауыл шаруашылығы вице-министрі Нұрбек Даирбеков.

Сонымен қатар, басшының хабарлауынша, Қазақстанда 402 миллионнан астам жұмыртқа және 2,1 миллион тонна азық-түлік бидайы бар.

Тез бұзылатын өнімдер үшін азық түлік қоры бір аптаға немесе одан да көп уақытқа, жарамдылық мерзімі ұзақ болатын тауарларға бірнеше айға дейін беріледі.

«Айта кету керек, азық-түлік өндірісі артып, қорлар үнемі жаңарып, толықтырылып отырады, атап айтқанда жаңадан өнім жинау арқылы да толықтырылады. Сондықтан әлеуметтік маңызы бар азық-түлік тауарларының жетіспеушілігі жоқ және ондай қауіп туындамайды. 2020 жылдың қаңтар-маусым айларында тамақ өнімдерін өндіру көлемі ақшалай түрде 904 млрд.теңгені құрады, бұл өткен жылдың осы кезеңімен салыстырғанда 19,4% -ға көп», - деді Нұрбек Даирбеков.

Сонымен қатар, ол қазіргі уақытта Алматы, Жамбыл, Қызылорда және Түркістан облыстарында картоп, пияз, сәбіз, қырыққабат, қияр, қызанақ жиналып жатқанын жеткізді. Сондықтан Ауыл шаруашылығы министрлігі жаз маусымының басталуына байланысты көкөніс бағасы төмендейді деп күтуде.