Түркістанда мың тонна банан жинау жоспарлануда

Жақын арада Түркістан облысы Сайрам ауданы Қайнарбұлақ ауылдық округіндегі Gen Group Kazakhstan ЖШС жылыжай кешенінде бананның алғашқы өнімін жинау жоспарлануда. Банандар 5,3 гектар жерде өсіріледі. Бұл туралы Өңірлік коммуникациялар қызметі хабарлады.

Серіктестік иесі Ислам Әлиевтің айтуынша, алғашқы өнім 1-2 ай ішінде пайда болады. Түрік технологиясымен іске қосылған жылыжайларда өткен жылы 7400 банан ағашының көшеттері отырғызылды.

Жылына 1000 тоннаға дейін өнім алуды жоспарлап отырған кешенде бүгінде 150 адам жұмыс істейді. Өнімдер Қазақстанның ішкі нарығында сатылатын болады.

Бүгінде Сайрам ауданында бананнан басқа лимон мен құрма сияқты экзотикалық жемістер де өндіріледі.