Қазақстанда қант қызылшасын жинау аяқталды
Қазақстанда қант қызылшасын жаппай жинау аяқталды. Орташа өнімділігі гектардан 535,5 ц болған кезде шамамен 1,3 млн тонна қант қызылшасы жиналды, деп ҚР Үкіметінің баспасөз қызметі хабарлады.
20 желтоқсандағы жағдай бойынша қазақстандық қант зауыттары 988,6 мың тонна тамыр дақылын өңдеуге қабылдады: «Ақсу қант» – 351,7 мың тонна (оның ішінде Жамбыл облысынан 39,3 мың тонна), Көксу қант зауыты – 252,6 мың тонна, Меркі қант зауыты – 384,3 мың тонна. Егіннің қалған бөлігі қайта өңдеуді күтіп тұрған фермерлердің кагаттарында.
Үкімет фермерлерге қызылша қай зауытқа тапсырылғанына қарамастан, әкімдіктер тарапынан да, қант зауыттары тарапынан да қолданыстағы тәртіппен субсидиялар төленетінін атап өтті.
Облыс әкімдігінің мәліметінше, Жетісу өңірі үшін қант қызылшасының қазіргі өнімі рекордтық көрсеткішке ие болды - 635 мың тонна. Бүгінгі таңда 600 мың тоннаға жуық Ақсу және Көксу қант зауыттарына қайта өңдеуге тапсырылды. Екі кәсіпорында да шикізатты қабылдау жалғасуда.
Көксу қант зауыты биыл 260 мың тоннаға дейін қызылша қабылдауды жоспарлап отыр.
«Бүгінгі таңда 254 мың тонна қант қызылшасы қабылданды, оның 164 мың тоннасы қайта өңделді. Зауыт белгіленген қуатта жұмыс істейді. Жалпы, осы жылға дейін біз 200 мың тоннаға дейін қызылша қабылдадық, ал биыл егін мол болғандықтан тағы 60 мың тонна қосу жоспарлануда. Бүгінгі таңда шаруашылықтармен есеп айырысу жүргізіліп, 2,5 млрд теңге төленді. Өнімді сату барысында біз есепті әрі қарай уақтылы жүргізетін боламыз», - деді Көксу қант зауытының директоры Алтынбек Абатов.
Биыл Жетісу облысында қант қызылшасының егіс алқабы 1,7 есеге ұлғайтылып, 13,7 мың гектарға жеткізілді, 635 мың тонна тамыр дақылдары жиналды. Екі қант зауытында 94 мың тонна қант өндіру жоспарлануда, оның 64 мың тоннасы қант қызылшасынан өндірілетін болады. Сондай-ақ, бес қызылша ауданында сегіз жаңа сервистік-дайындау орталығы құрылды, 30 шаруа қожалығы үшін қант қызылшасын өндіруге қажетті құны 2,5 млрд теңге болатын 62 бірлік техника сатып алынды.