Азық-түлік корпорациясы астық сатып алу бағасын есептеу үшін нарыққа талдау жүргізеді
Қостанай облысының Ауыл шаруашылығы тауарын өндірушілер қауымдастығы бұған дейін Азық-түлік корпорациясына ағымдағы маусымда астық сатып алу бағасына қатысты ұсыныс жолдаған болатын. Қауымдастық өз есептеулерінде астық өндіруге кететін шығындарды және өндірістің табыстылығын қамтамасыз ету қажеттілігін ескерді. Өтінішке жауап бере отырып, Азық-түлік корпорациясы өндірушілердің есептеулерін ескеруге уәде берді, бұл ретте түпкілікті шешім қабылдау кезінде нарыққа әсер ететін факторлар кешені ескерілетінін атап өтті.
«Өз жауабында ұлттық оператор фермерлермен тұрақты диалогта екенін және баға параметрлерін анықтау кезінде кешенді тәсілді басшылыққа алатынын атап өтті.
Сатып алу құнына әсер ететін негізгі факторлардың ішінде: ішкі және сыртқы нарықтардағы ағымдағы трендтердің мониторингі; әлемдік және өңірлік баға индикаторларына бағдарлану; ауыл шаруашылығы тауарын өндірушілердің (АШТӨ) болжамды шығындарын есептеу; облыс әкімдіктері мен салалық бірлестіктердің баға ұсынымдарын есепке алу; валюта бағамдарының, сондай-ақ тасымалдау мен сақтауға арналған шығындардың әсерін бағалау», - деп хабарлады ұлттық компанияның жауабымен танысып, қауымдастықта.
Сондай-ақ Азық-түлік корпорациясы барлық келіп түскен баға ұсыныстары ағымдағы маусымның сатып алу бағаларын түпкілікті бекіту кезінде назарға алынатынына сендірді.
Жауапқа түсініктеме бере отырып, Қостанай облысының Ауыл шаруашылығы тауарын өндірушілер қауымдастығы баға белгілеудің негізгі факторларының арасында аграршылардың болжамды шығындарын есептеуге ерекше назар аудару маңызды екенін атап өтті. Сарапшылардың пікірінше, бұл критерий 1 гектарға нақты шығындар негізінде есептелген дақылдардың кірістілік индексімен тікелей байланысты болуы керек.
«Баға белгілеу бойынша сындарлы диалогты жалғастыру үшін, ұлттық оператор ретінде Азық-түлік корпорациясы өзінің баға саясатын түпкілікті анықтаған кезде осы дәлелді ескеруі өте маңызды. Бұл тәсіл шаруашылықтардың экономикалық тұрақтылығын сақтауға, фермерлерді заманауи ауыл шаруашылығы технологияларын пайдалануға ынталандыруға және астық нарығында әділ бағаны фермер анықтауы керек деген қағиданы нығайтуға көмектеседі», - деп қорытындылады Қауымдастықта.
Естеріңізге сала кетейік, бұған дейін Қостанай облысының Ауыл шаруашылығы тауарын өндірушілер қауымдастығы тоннасына астық сатып алудың ең төменгі бағасын келесі мөлшерде белгілеуді ұсынған болатын:
- 23-24 желімшесі бар 3-сыныпты жұмсақ бидай - 112 мың теңге
- 25-27 желімшесі бар 3-сыныпты жұмсақ бидай - 120 мың теңге
- 28 және одан жоғары желімшесі бар 3-сыныпты жұмсақ бидай - 150 мың теңге
- 4 және 5-сыныпты жұмсақ бидай - 100 мың теңге
- 3-сыныпты қатты бидай - 130 мың теңге
- 2-сыныпты арпа - 95 мың теңге