Сауд Арабиясынан келген компания Қазақстанда ет өңдеуді ашуға дайын

Сауд Арабиясының SALIC ірі ауылшаруашылық компанияларының бірінің бас директоры Сулайман Алрумаих ҚР аумағында ет өндіретін кәсіпорын ашуға қызығушылық білдірді. Бұл туралы ол Астанада Қазақстан АШМ басшылығының қатысуымен өткен дөңгелек үстелде мәлімдеді, деп хабарлайды KAZAKH INVEST баспасөз қызметі.

Оның айтуынша, SALIC Сауд Арабиясында осыған ұқсас 10-нан астам жобаны жүзеге асырған және бұл тәжірибені Қазақстанда қолдануға дайын.

Қазақстан ауыл шаруашылығы министрі Ербол Қарашөкеев пен Сауд Арабиясы ауыл шаруашылығы министрі Абдулрахман Альфадли бірлескен инвестициялық жобаларды іске асыру арқылы АӨК дамытуға жәрдемдесуге дайын екендіктерін білдірді.

Мал шаруашылығы және өсімдік шаруашылығы өнімдерін қайта өңдеу саласындағы ынтымақтастыққа, сондай-ақ ауыл шаруашылығы инфрақұрылымын дамытуға және жаңа технологияларды енгізуге ерекше назар аударылды.

Ербол Қарашөкеев екі елдің азық-түлік қауіпсіздігін қамтамасыз етуге ұмтылысын ескере отырып, Қазақстанның қарым-қатынастарды кеңейтуге дайындығын атап өтті. Қазақстан ауыл шаруашылығы министрлігінің басшысы елдер арасындағы ауыл шаруашылығы өнімінің айналымын ұлғайту үшін ҚР-да халал өнімдерінің сапасын сертификаттаудың жалпы орталығын құруды ұсынды.

KAZAKH INVEST Басқарма төрағасының орынбасары Жандос Темірғали Қазақстан мен Сауд Арабиясының инвестициялық портфелі қазіргі уақытта 1 млрд доллардан астам сомаға 12 жобадан тұратынын атап өтті. Оның айтуынша, елдер агроөнеркәсіптік кешен саласындағы жобаларды іске асыру үшін жоғары әлеуетке ие.