Қытай Қазақстаннан сүт өнімдерін экспорттайтын кәсіпорындардың тізімін көбейтуде

Қазақстандық үш сүт өндіруші кәсіпорын Қытайдың Бас кеден әкімшілігінің тізіліміне енгізілді. Бұл туралы Ауыл шаруашылығы вице-министрі Гүлмира Исаева мәлімдеді.

«Қазақстанның тағы үш сүт өңдеу кәсіпорны Қытайға сүт өнімдерін экспорттай бастайды», - деп хабарлады Гүлмира Исаева Facebook парақшасында.

 Оның айтуынша, ҚХР Бас кеден әкімшілігінің сүт өндіруші тізіліміне «Лидер-2010» (Қостанай облысы, Рудный), Гормолзавод (Ақмола облысы, Көкшетау), Дәулет-Бекет (Алматы облысы, Талдықорған) енгізілген.

Осылайша, қазірдің өзінде Қазақстанның сүт өңдеу саласы бойынша 6 кәсіпорын ҚХР-ға сүт өнімдерін сата алады.

Вице-министр атап айтқандай, 2019 жылдың 11 қыркүйегінде Қазақстаннан ҚХР-ға сүт және сүт өнімдерін экспорттауға ветеринарлық-санитарлық талаптар туралы хаттамаға қол қойылған болатын.