Қазақстанда су тасқыны салдарынан 8 мыңнан астам малдың қырылғаны расталды

Бүгінгі таңда залалды өтеу жөніндегі Комиссия су тасқыны салдарынан 8,2 мың бас ауыл шаруашылығы жануарларының қырылғанын растады. Бұл туралы ҚР Ауыл шаруашылығы министрлігінде хабарлады.

Жалпы өлім-жітімнің 70%-ға жуығы ұсақ мал екендігі атап өтілді.

Министрліктің Республикалық эпизоотияға қарсы жасағы облыс әкімдіктерімен бірлесіп өлген жануарларды жинау және кәдеге жарату бойынша жұмысты жалғастыруда. Бүгінгі таңда барлық өлген малдың 97%-ы кәдеге жаратылды.

Су басу өңірлеріндегі эпизоотиялық жағдайды тұрақты ұстау мақсатында Ветеринариялық бақылау және қадағалау комитеті су басу аймақтарында қалған мал қорымдарын профилактикалық дезинфекциялық өңдеуді жүргізеді.

Ауыл шаруашылығы министрлігінің мәліметінше, өңірлерде өлген жануарлардың иелеріне өтемақы төленеді. Бүгінгі таңда Қостанай облысында 780 бас ауыл шаруашылығы жануарлары үшін 113,2 млн теңге төленді, Ақтөбе облысында 753 бас ауыл шаруашылығы жануарлары үшін 98,3 млн теңге төленді. Қарағанды облысында ауыл шаруашылығы жануарларына келтірілген залал толығымен өтелді, Батыс Қазақстан облысында өтемақыға 187,4 млн теңге бөлінді, өтінімдерді қабылдау рәсімі жүріп жатыр, төлем аптаның соңында басталады. Атырау және Ақмола облыстарында өтеуге өтінімдер қабылдануда.

«Ауыл шаруашылығы жануарларының иелеріне өтемақы төлеу бюджет қаражатынан да, бюджеттен тыс көздерден де жүргізіледі», - деп түсіндірді ведомствода.

ҚР Ауыл шаруашылығы министрлігінің жанынан «жедел желі» жұмыс істейді, оған сағат 09.00-ден 18.30-ға дейін 8 (7172) 57 33 58, 8 747 094 33 81 телефондары бойынша жүгінуге болады. Сондай-ақ, pavodki_kz_bot телеграмм боты іске қосылды (тәулік бойы жұмыс істейді).