Арыс қаласында австралиялық әдіс бойынша бордақылау алаңы іске қосылады

Turkestan Agro.kz компаниясы Арыс қаласында 50 мың бас ірі қара мал бордақылау алаңын салып жатыр. Құрылыс, бордақылау және жаю схемасы австралиялық «торлы» мал шаруашылығы әдісімен жасалады. Бұл туралы ҚР премьер-министрінің баспасөз қызметі хабарлады.

Құрылыс алаңына Түркістан облысына жұмыс сапары барысында вице-премьер Серік Жұманғарин келді.

Жобаны іске асырудың бірінші кезеңінде биыл бордақылау алаңына 15 мың бас, 2025-2026 жылдары тағы 10 мың бас, ал 2026-2027 жылдары 25 мың бас сатып алынады.

Сондай ақ Арыс қаласында Turkestan Agro.kz 4 710 гектар алқапта суарудың жаңбырлату технологияларын қолдана отырып, малға арналған жемшөп дақылдарын өсіруді жоспарлап отыр. Бұл мал бордақылау алаңын қажетті азық көлемімен қамтамасыз етуге мүмкіндік береді.

Компания басшысы Сырым Ертаевтың айтуынша, қазіргі уақытта АӨК саласындағы инвестициялық жобаларға қаржы институттары бөлетін жеңілдетілген қаржыландырудың болмауына байланысты жобаны іске асыру баяулады. Сондай-ақ, «Көксарай» су арнасынан жерді суару үшін суды пайдалануға рұқсат алуда мәселелер бар.

Серік Жұманғарин Ауыл шаруашылығы министрлігіне қысқа мерзімде инвестициялық жобалар бойынша кеңес өткізіп, қаржыландыру мәселесін шешуді тапсырды. Ол сондай-ақ Су ресурстары және ирригация министрлігімен суармалы суды пайдалану мәселесін пысықтауды тапсырды.

Бұған дейін вице-премьер Серік Жұманғарин бастаған Қазақстаннан келген делегация мал шаруашылығын жүргізудің озық әдісін зерделеу үшін Австралияға барған болатын. Үкіметте атап өткендей, Қазақстандағы мал өсірушілердің басты мәселелерінің бірі өндірушілерге өз өнімдері үшін әділ баға алуға мүмкіндік бермейтін ет сату кезіндегі көптеген делдалдық схемалар болып табылады. Сондықтан Ауыл шаруашылығы министрлігінің, өңірлік билік пен агробизнестің өкілдері елімізде осындай тәжірибені енгізу мақсатында мал биржаларының тәжірибесін зерделеді.