Қазақстан 2024 жылы 30 мың аналық мал басын импорттауды жоспарлап отыр

Ағымдағы жылы сүт-тауар фермаларын салу жөніндегі жобаны іске асыру шеңберінде ірі қара малдың 30 мың басын Қазақстанға импорттау жоспарлануда. Бұл туралы ҚР Ауыл шаруашылығы министрі Айдарбек Сапаров Үкімет отырысында мәлімдеді.

«Бүгінгі таңда сегіз облысқа 7,4 мың бас немесе жоспарланған көлемнің 24,6%-ы әкелінді», - деді министр.

Ол сүт мал шаруашылығында импортты алмастыру жөніндегі міндетке сәйкес ағымдағы жылы қуаты 373 мың тонна сүтті шығаратын 65 СТФ іске қосу жоспарланғанын хабарлады. Бұл мақсаттарға республикалық бюджет қаражатынан 100 млрд теңге бағытталды.

І жартыжылдықтың қорытындысы бойынша қуаттылығы 67,2 мың тонна сүтті шығаратын 16 жоба пайдалануға берілді. Осылайша, жылдық жоспардың орындалуы 24,6% құрады.

Ет бағытындағы құс фабрикаларын құру және кеңейту бойынша ағымдағы жылы жалпы қуаттылығы 72 мың тоннаға жуық құс етін құрайтын 10 жоба жоспарланған, оның ішінде Алматы және Қызылорда облыстарында екі жоба немесе жоспардың 20% іске қосылды.

«Облыстық әкімдіктер ветеринариялық пункттерді, мал қорымдарын немесе инсинераторлар мен сою пункттерін салу және сатып алу жөніндегі индикативтік жоспарды орындауды тиісті деңгейде жүргізбейді. Солтүстік Қазақстан мен Жетісу облыстарынан басқа барлық облыстар қойылған міндетті орындай алмады. Эпизоотиялық салауаттылықты қамтамасыз ету және ветеринариялық қызметтің әлеуетін дамыту үшін өңірлер міндетті түрде осы объектілермен қамтамасыз етілуі тиіс екенін ескеру керек. Бұл үшін өңірлерге осы бағыттағы жұмысты күшейту қажет», - деп атап өтті АШМ басшысы.