Қазақстан Арменияға ет экспортын қайта бастады

Солтүстік Қазақстан облысындағы EMC Agro компаниясы (ҚР ет және ет өнімдерін ірі өндірушілердің үштігіне кіреді) Арменияға алғашқы 20 тонна мұздатылған шошқа етін жіберді. Қазіргі уақытта Грузияға ет жеткізу де жоспарлануда. Бұл туралы EMC Agro хабарлады.

«Біз шошқа етін Грузияға экспорттау туралы келіссөздер жүргіздік. Жақында бұл елге алғашқы 20 тонна ет жіберіледі. Мұны Қазақстан үшін үлкен оқиға деп атауға болады, өйткені бұл нарық бізге енді ғана ашылуда. Армения мен Грузия бізден ай сайын 400 тоннаға дейін ет сатып алуға дайын екендіктерін білдірді», - деп атап өтті EMC Agro.

Сонымен қатар, компания әлемдегі шошқа етінің ең ірі тұтынушысы Қытаймен ынтымақтастықты қарастыруда. Осы жылдың жазында Қытай ет қауымдастығының өкілдері EMC Agro өндірістік кешеніне барды. Өндірісті тексергеннен кейін қауымдастық жылына 20 мың тонна шошқа етін импорттауға қызығушылық білдірді.

«Біздің ет жоғары сапалы, біз өз өнімдерімізге күмәнданбаймыз, әртүрлі елдермен жемісті ынтымақтастыққа дайынбыз. Қытайға келетін болсақ, көрші өткізу нарығы бізге маңызды, алайда бұл бағытта бізге мемлекет тарапынан қолдау қажет. Біз ҚХР Бас кеден басқармасының ауыл шаруашылығы өнімдерін жеткізушілер тізіліміне кіре алмаймыз, осыған байланысты бұл елдің нарықтарына шығу мүмкін емес. Айта кетейік, импортқа салынған тыйым Қазақстанның оңтүстік-шығыс жеті облысына ғана алынып тасталды. Бірақ біздің аймақтар Қытайға әлі мұздатылған ет жеткізе алмайды», - деп хабарлады компанияда.

EMC Agro Қазақстанда ай сайын 700-800 тонна шошқа етін сатады. Ет комбинатының өндірістік қуаты жылына 20 мың тонна ет және тәулігіне 30 тонна дайын өнім өндіруге мүмкіндік береді.