Қазақстан Еуропадан мал импорттаудың жаңа жолдарын іздестіруде

Ағымдағы жылы ЕО елдерінде – Германия, Венгрия және Словакияда аусылдың бірнеше ошағы тіркелді. Карантиндік аймақтардың құрылуына және шектеулердің енгізілуіне байланысты ЕО-дан Қазақстанға мал жеткізудің кейбір бағыттары қолжетімсіз болып шықты. ҚР Ауыл шаруашылығы министрлігінің өкілдері Болгарияның Ұлттық ветеринариялық қызметінің басшысы Илья Костовпен кездесуде ықтимал жаңа логистикалық бағыттарды талқылады, деп АШМ баспасөз қызметі хабарлады.

Кездесу Дүниежүзілік жануарлар денсаулығы ұйымының 92-ші Бас Ассамблеясы аясында өтті.

Ауыл шаруашылығы министрлігінің мәліметінше, келіссөздер барысында Еуропалық Одақ елдерінен асыл тұқымды сүтті ірі қара малды импорттауды көздейтін Қазақстандағы өнеркәсіптік сүт-тауар фермаларын дамыту бағдарламасын іске асыруға ерекше назар аударылды. Аусыл мен блютанг ошақтарын тіркеуге байланысты қазіргі эпизоотиялық жағдайды, сондай-ақ бірқатар карантиндік орындардың, соның ішінде Венгрияда екі пункттің жабылуын ескере отырып, тұрақты жеткізуді қамтамасыз ету үшін жаңа логистикалық шешімдерді табу қажеттілігі туындады.

"Қазақстандық тарап ЕО мен ҚР Ветеринариялық талаптарына жауап беретін Болгария аумағында аттестатталған карантиндік алаң ашу мүмкіндігін қарастыруды ұсынды. Болгария теңіз портын асыл тұқымды ірі қара малды теңіз арқылы жеткізуді жүзеге асыру үшін сертификаттау келешегі одан әрі талқыланды. Бұл бастаманы іске асыру экспорттық бағыттарды кеңейтуге және жануарлар импорты кезінде логистикалық тұрақтылықты арттыруға мүмкіндік береді", - деп атап өтті АШМ.

Тараптар серіктестікті тереңдетуге өзара мүдделілігін растады және барлық қозғалған мәселелер бойынша техникалық консультацияларды жалғастыруға дайын екендіктерін білдірді.