Қазақстанда ет экспорты кезінде делдалдарды алып тастау жоспарлануда

Қазақстанда желтоқсан айында сиыр етінің экспорты тек өндірушілер ала алатын квоталар бойынша жүргізіледі. Осы шешіммен үкімет өнімсіз делдалдардың қызметін шектеуге және ел ішіндегі ет бағасын тұрақтандыруға ниетті. Бұл туралы ауыл шаруашылығы министрі Айдарбек Сапаров Мәжіліс депутатының сұрағына жауап ретінде мәлімдеді.

Ауыл шаруашылығы министрлігінің басшысы сиыр етінің экспортына квота енгізу туралы шешімді 29 тамызда Сыртқы сауда саясаты жөніндегі ведомствоаралық комиссия қабылдағанын еске салды. Бұл ретте ресми түрде ағымдағы жылдың 3-31 желтоқсаны аралығында 13 мың тонна көлемінде шектеулер енгізілді.

Квоталарды енгізудің мақсаты мал шаруашылығы өнімдерін қайта өңдеуді дамытуды ынталандыру және ет тапшылығының алдын алу болып табылады.

«Ұсынылған тәсіл олигополияны құруды немесе бәсекелестікті шектеуді мақсат етпейтінін атап өткен жөн. Керісінше, оның мақсаты - өндірістің толық циклін құру негізінде өркениетті, ашық және жауапты нарық құру. Бұл тәсіл малды көрші елдерге шағын цехтармен қайта сату мүмкіндігін жоққа шығарады (мұндай компаниялар малды сатып алып, етті Өзбекстанға бордақылаусыз қайта сатты). Мұндай тәжірибе бұрмалануға әкеліп соқтырды және сиыр етінің ішкі бағасының көтерілу себептерінің бірі болды», - деп түсіндірді Айдарбек Сапаров.

Осылайша, оның айтуынша, квоталарды енгізу мал өсірумен және бордақылаумен айналыспайтын, тек жануарларды қайта сататын делдалдарды жоюға бағытталған. Олардың қызметі сиыр етінің бағасын негізсіз көтеруге әкеледі және саланың дамуына ықпал етпейді.

Сонымен қатар, мал шаруашылығында жұмыс істейтін фермерлерді қолдау үшін елде субсидиялар мен жеңілдікті несиелер түрінде бірқатар мемлекеттік қолдау шаралары қолданылады.