Қарағанды облысында құны 800 млн теңге болатын ет комбинаты іске қосылды

Қарағанды облысының Абай ауданында инвестиция көлемі 800 млн теңгені құрайтын Alisha Group ет өңдеу кешенінің құрылысы аяқталды. Кәсіпорын салқындатылған және мұздатылған ет, консервілер мен вакуумдық қаптамадағы өнімдер шығаратын болады, деп облыс әкімдігінің баспасөз қызметі хабарлады.

Ет өңдеу кешені жылына 2400 тоннаға дейін өнім өндіруге есептелген. Кешенге мал сою пункті, ет өңдеу және консервілеу желісі, сондай-ақ қой фермасы кіреді. Мұнда тәулігіне 300 бас ұсақ және 50 бас ірі қара мал өңделеді. Шикізат жергілікті фермерлерден сатып алынады, ал кейінірек өзінің шаруашылығын дамытады.

Alisha Group бас директоры Рустам Қалиевтің айтуынша, кәсіпорын сапа мен экспорттың жоғары стандарттарына бағдарланған.

«Кәсіпорында түрік өндірісінің екі тәуелсіз желісі бар, ал өнімдер халал стандарттарына және тамақ қауіпсіздігінің халықаралық талаптарына сәйкес келеді. Бұл Қазақстан нарығына ғана емес, Парсы шығанағы, Еуропа және Қытай елдеріне жеткізілімдерді жолға қоюға мүмкіндік береді. Жобаның әлеуеті зор», — деді Рустам Қалиев.

Абай ауданында қайта өңдеуге арналған шикізат бар, жаңа кәсіпорында фермерлермен байланыс және ыңғайлы логистика жолға қойылған. Қалаға жақын орналасуы қызметкерлер мен көлікке қолжетімділікті жеңілдетеді.

Бастапқыда мұнда 20 жұмыс орны құрылды, бірақ болашақта қызметкерлер санын кеңейту жоспарда бар.

Жоспарда — өндірісті кеңейту және етті терең өңдеуді бастау. Бұл кәсіпорынның ауқымы мен жүктемесін арттыруға көмектеседі, сонымен қатар жергілікті шаруашылықтарға қосымша табыс әкеледі.

Бұдан басқа, 500 бас ірі қара мен 3 мың бас ұсақ малды бордақылау базасын, сондай-ақ терең өңдеудің жаңа кешенін салу үшін құжаттама дайындалуда.