Депутаттар «Өз жем-шөбіміз» бағдарламасына қосымша қаржы бөлуді сұрайды

2023 жылдан бастап «Өз жем-шөбіміз» бағдарламасы аясында 20,1 млрд теңге сомасына 1559 фермер қаржыландырылды, бұл ретте бөлінген қаражат мерзімінен бұрын игерілді. Осыған байланысты Мәжіліс депутаттары ҚР премьер-министрінің орынбасары Серік Жұманғариннің атына мал шаруашылығының жемшөп қорын дамыту үшін қосымша қаржы бөлу туралы сауал жолдады.

«Мал шаруашылығының дамуы, ең алдымен, саланы өз өндірісінің жемімен қамтамасыз етуге байланысты. 2023 жылдан бастап «ҚазАгроҚаржы» АҚ «Өз жем-шөбіміз» бағдарламасын іске асыруда.. Бағдарламаны қаржыландыру көлемі 20 млрд теңгені құрады. Бұл бағдарлама жемшөп дайындайтын кәсіпорындарды заманауи ауыл шаруашылығы техникасымен жаңартуға және қамтамасыз етуге бағытталған. Бюджет қаражаты белгіленген мерзімге дейін толық игерілді», - деді депутат Еркебұлан Мәмбетов.

Депутаттардың пікірінше, жемшөп өндірісін дамыту үшін қосымша қаражат бөлу қазақстандық фермерлерге мал шаруашылығының жемшөп қорына қажеттілігін уақтылы қамтамасыз етуге, ауыл шаруашылығы жануарларының өнімділігі мен мал шаруашылығы өнімі көлемінің өсуін ұлғайтуға мүмкіндік береді. Сонымен қатар, техника паркін жаңарту, еңбек өнімділігін арттыру, сондай-ақ жаңа жұмыс орындары құрылатын болады.

«Саланы жемшөп қорымен қамтамасыз ету оның тұрақты өсуіне, сондай-ақ тұтастай алғанда экономиканың дамуына және елдің әлемдік нарықтағы ұстанымын нығайтуға ықпал ететін болады. Жоғарыда аталған бағдарламаны дамыту үшін қосымша қаражат бөлу мәселесін қарастыруды сұраймыз», - деді Еркебұлан Мәмбетов.

Сауалда шетелдік өндіріс техникасын қаржыландыруға шектеулер мәселесі жеке белгіленді. Депутаттар бағдарлама аясында мұндай жабдықты сатып алуды қолдау мүмкіндігін қарастыруды сұрап отыр, себебі жемшөп жинауға арналған барлық жабдықтар Қазақстанда өндірілмейді.