Қазақстанда балық шаруашылығына субсидия беріледі
Қазақстанда балық импортына тәуелді болуды азайту мақсатында балық шаруашылығын қолдауға бағытталған бірнеше шешімдер қабылданды. Балық шаруашылығын дамытудың 2030 жылға дейінгі бағдарламасы әзірленді, аталған жұмыс аяқталар кезде өсірілген балық көлемі жылына 270 мың тоннаға дейін артатын болады. Бұл туралы брифингте экология, геология және табиғи ресурстар Министрлігі Балық шаруашылығы комитетінің төрағасы Нариман Жүнісов хабарлады.
Бағдарламада айтылған мемлекеттік қолдау шаралары келесідей салаларда жасалады: балық өсірудегі-биологиялық негіз, балық өсіру материалдары, дәрілік препараттарды сатып алу, бағалы балық түрлерінің ұрғашы табындарын сатып алу мен күтіп-ұстауға арналған шығындарды 50% - ға дейін субсидиялауды қамтиды.
Тақырыпқа байланысты оқу: АШМ балық шаруашылығына арналған субсидия мөлшерін белгіледі
Сондай – ақ балық шаруашылығымен айналысуға арналған үлгі ретіндегі шарт бекітілді және оны жасасудың нақты мерзімі-49 жыл. Бұрын келісім-шарт жасасу мерзімі 5 жылдан 49 жылға дейін болатын.
Осы жағдайға байланысты балық шаруашылығын дамыту жоспарларында балық өсірушілерге қойылатын артық талаптар алынып тасталды. Балық өсіру шаруашылықтарын су қорғау белдеуіне орналастыру бойынша шектеулер де алынып тасталды. Балық өсіру тоғандары мен бассейндерін салу кезінде жобалау-сметалық құжаттаманы әзірлеу және мемлекеттік сараптаманың қорытындысын алу жөніндегі талаптар да күшін жойды.
Сонымен қатар, бизнес өкілдері ауыл шаруашылығы мақсатындағы жерлерде балық өсіру шаруашылықтарын салу кезіндегі шығындарды өтеуден босатылды.
Экология министрлігі баспасөз қызметінің мәліметінше, балық өсіру көлемін арттыру елдегі жарамды су қоймаларын пайдалану және жаңа инвестициялық балық өсіру жобаларын іске асыру есебінен жоспарланып отыр. 2030 жылға дейін 1283 жаңа балық өсіру шаруашылығы салынады және жұмыс істеп тұрған 288 шаруашылықта балық өсіру көлемі артады.
Қойылған мақсаттарға қол жеткізу үшін балық шаруашылығына 10 жыл ішінде 340 млрд теңге жеке инвестиция салу және мемлекеттік бюджеттен 200 млрд теңге бөлу жоспарланып отыр.
Ағымдағы жылы жұмыс істеп тұрған балық өсіру шаруашылықтарында 12,8 мың тонна балық өсірілетін болады. Жедел мәліметтер бойынша, жыл басынан бері шамамен 7,6 мың тонна тауарлы балық өсірілді.