Ресей астығының Қазақстан арқылы транзиті 24%-ға өсті

Ресей оған қатысты енгізілген санкциялар аясында биыл Орталық Азияға астық жеткізуді ұлғайтты. "Қазақстан темір жолы" ұлттық компаниясының деректері бойынша ағымдағы жылы Қазақстан арқылы транзит көлемінің айтарлықтай өсуі байқалады.

"Қазақстан аумағы бойынша Ресейден транзитпен астық тасымалдау көлемі оң серпінді көрсетіп отыр. 2022 жылдың 10 айында транзит көлемі 2021 жылдың сәйкес кезеңімен салыстырғанда 24% - ға (301 мыңға 372 мың) өсті", - деп хабарлады ҚТЖ.

Бұл ретте компания Қазақстан аумағы бойынша ресейлік астықты транзиттік тасымалдаудың тарифтік шарттары соңғы 4 жылда өзгеріссіз қалып отырғанын хабарлады. 

Сонымен қатар, "Ресей темір жолдары" Қазақстанға астық тасымалдауға транзиттік тарифті төмендету туралы өтініш жіберді. Өз кезегінде қазақстандық астық трейдерлері Ресей үшін тарифті көтеруді ұсынды, өйткені Орта Азия қазақстандық астық пен ұн экспортының негізгі бағыты болып табылады және ресейлік астықпен бәсекелестік шиеленіскен жағдайда Қазақстан осы нарықтың 30% жоғалтуы мүмкін.

Ресей астығының транзиті үшін тариф қайта қаралады ма - ҚТЖ әлі хабарлаған жоқ.