Қазақстан Тәжікстанмен 1,8 млрд долларға келісім-шарт жасасты

Астанада өткен қазақстан-тәжік бизнес-форумы барысында 1,8 млрд доллардан астам сомаға 39 коммерциялық келісімшарттар мен келісімдер жасалды. Бұл ферроқорытпаларды, бидайды, алюминий тотығын, мұнай коксын, күнбағыс майын, тау-кен өнеркәсібін дамытуға арналған жабдықтарды, JAC автомобильдерін және басқа да өнімдерді жеткізуге арналған экспорттық шарттар. Бұл туралы ҚР сауда және интеграция министрлігінің баспасөз қызметі хабарлады.

ҚР премьер-министрінің орынбасары – сауда және интеграция министрі Серік Жұманғариннің айтуынша, бүгінде Қазақстанда Тәжікстанмен бірлескен 418 кәсіпорын жұмыс істейді. 2005 жылдан бастап біздің еліміз бауырлас республиканың экономикасына шамамен 132 млн доллар инвестиция салды, тәжік инвестицияларының ағыны шамамен 21 млн долларды құрады.

Форумға қатысушылар ауыл шаруашылығы және өнеркәсіп саласындағы ынтымақтастықтың жоғары әлеуетін, сондай-ақ кооперациялық жобаларды дамыту қажеттігін атап өтті. Бизнес-форум алаңында тараптар өздерінің инвестициялық мүмкіндіктерін таныстырды.

"Қазақстанның Тәжікстанға жалпы сомасы 140 млн доллар болатын 60 тауар позициясы бойынша экспортты ұлғайту әлеуеті бар. Бұл өңделген өнімдер, соның ішінде күнбағыс майы мен ұн. Тәжік нарығына қызмет көрсетушілер үлкен қызығушылық танытуда, олардың ішінде ауыл шаруашылығы саласы үшін жерді қашықтықтан зондтау және спутниктік байланыс қызметтері, IT", - деді Серік Жұманғарин.

Тақырып бойынша оқу: Қазақстан Тәжікстанға 50 мың тонна бидай жеткізеді

Форум аясында Қазақстан-тәжік іскерлік кеңесінің үшінші отырысының ашылуы өтті, онда сыртқы сауда қызметін жүргізу мәселелері талқыланды.

Іс-шараны QazTrade, Қазақстанның сыртқы сауда палатасының қолдауымен ҚР сауда және интеграция министрлігі, Мемлекеттік мүлікті инвестициялау және басқару жөніндегі мемлекеттік комитет және Тәжікстанның Сауда-өнеркәсіп палатасы ұйымдастырды.