Абай облысында Қытайға жаңа темір жол құрылысы басталды

Абай облысында ұзындығы 272 км болатын Бақты-Аягөз жаңа теміржол желісінің құрылысы басталды, деп хабарлады ҚР Премьер-Министрінің баспасөз қызметі.

Бақты-Аягөз теміржол желісі Қазақстан мен Қытай арасындағы өткізу қабілетін 28 млн-нан 48 млн тоннаға дейін ұлғайтуға, оңтүстік өткізу пункттеріне жүктемені азайтуға және транзиттің қосымша көлемін тартуға мүмкіндік береді. Екі жолды теміржол 2027 жылы пайдалануға беріледі деп жоспарлануда. Жаңа желіні салу барысында Қытаймен Бақты – Чугучак үшінші шекара өткелін ашу жоспарлануда.

Ауқымды жоба жеке инвестордың қатысуымен МЖӘ қағидаттарында іске асырылатын болады. Құрылыс барысында 11 бекет салынады.

Құрылысты іске қосу рәсімінде Премьер-Министр Әлихан Смайылов өткен жылы Қазақстанның темір жолдары арқылы 30 жыл ішінде ең көп жүк тасымалданғанын, ол 245 млрд тонна/километрді құрағанын атап өтті. Биыл да жоғары қарқын сақталып отыр.

«Соңғы бес жылда транзиттік контейнерлік тасымалдау көлемі 3,2 есе өсті. Қолданыстағы транзиттік дәліздер кеңейтіліп, жаңа транзиттік дәліздер ашылуда. Транскаспий халықаралық көлік бағыты, Солтүстік-Оңтүстік және Оңтүстік дәліздер ерекше өзектілікке ие болды», - деді Әлихан Смайылов.

Тақырып бойынша оқу: Қазақстан жыл соңына дейін Қытайға астық тиеуге тыйым салады

Сонымен қатар, бүгінгі таңда өткізу және инфрақұрылымдық қуаттылықтар өз шыңына жетті. Осы стратегиялық мәселені шешу үшін теміржол саласында бірқатар инфрақұрылымдық жобаларды іске асыру туралы шешім қабылданды.

Өткен жылдың қараша айында Достық – Мойынты учаскесінде екінші жолдардың құрылысы басталды. Ағымдағы жылы Алматы мен Дарбаза – Мақтаарал теміржол желісін айналып өтетін жаңа темір жол жұмыстары басталды. Барлығы үш жыл ішінде республикада 1300 шақырымнан астам темір жол салынады.