Жамбыл облысында өнеркәсіптік ауқымда ұлулар өсірілетін болады

Жамбыл облысында итальяндық Lumacheria Italiana компаниясы биылғы жылы өнеркәсіптік ауқымда ұлулар өсіруді бастауды жоспарлап отыр. Бұл туралы өңірлік әкімдіктің баспасөз қызметіне сілтеме жасай отырып, ElDala.kz хабарлайды.

Жоба жергілікті Meragro компаниясымен бірлесіп жүзеге асырылады. Итальяндық компания жобаны бірнеше кезеңге бөлуді ұсынады: облыс аумағында ұлулар өсіруді жолға қою, инкубатор салу, олар үшін жемшөп өндірісін бастау және ұлу етін өңдейтін кәсіпорын салу.

Бастапқы кезеңдерде инвестиция көлемі 2 млн еуродан асады. Компания жергілікті фермерлерді оқытуға дайын.

Компания өкілдері Жамбыл облысын таңдау қолайлы табиғи-климаттық жағдайларға байланысты екенін атап өтті, бұл әлемдік нарыққа қарағанда өнеркәсіптік көлемде ұлуларды төрт есе арзан өсіруге мүмкіндік береді. Жамбыл облысы Орталық Азиядағы өнеркәсіптік ауқымда ұлулар өсіретін бірінші өңір болады.

«Ұлу қабыршағы пен муцин, ұлулар шығаратын шырыш косметологияда қолданылады. Ұлу еті бірегей деликатес болып табылады және бүкіл әлемде үлкен сұранысқа ие», - деп атап өтті ведомствода.

Lumacheria Italiana ұлулар өндірісінде әлемдік көшбасшы болып табылады.