Қазақстанның агрохолдингтері жердің бір бөлігінен айырылуы мүмкін

Қазақстан Үкіметі 2023 жылғы қаңтарда ауыл шаруашылығы өндірушілерінде уақытша жер пайдалану құқығында болуы мүмкін жер телімдерінің шекті мөлшері туралы қаулы қабылдады. Бұл жер банкі белгіленген лимиттен асатын адал аграрлық компаниялардан жерді қайтаруға мүмкіндік береді. Агрохолдингтер жұмысының тиімділігін және олардың елдің азық-түлік қауіпсіздігіне қосқан үлесін ескере отырып, Сенат депутаты Талғат Жүнісов осындай компаниялардан жерді қайтару мүмкіндігін болдырмай, осы талапты қайта қарауды ұсынды. Тиісті сұрау салумен ол премьер-министр Олжас Бектеновке жүгінді.

«Бұл норма өз қызметі барысында елеулі инвестициялық қаражат салған, жұмыс орындарын құрған, инфрақұрылымды жолға қойған және қалпына келтірген ауыл шаруашылығы өндірушілерінің жылдар бойы жинаған барлық еңбегін жоюмен байланысты», - деді Талғат Жүнісов.

Ол ұзақ мерзімді жалдау мерзімі аяқталғаннан кейін ірі агроқұрылымдар сол шекараларда жерді пайдалану шартын ұзарта алмайтындығын атап өтті.

«Біздің ойымызша, жер телімдерінің шекті мөлшері туралы талап Үкімет шешімі қабылданғанға дейін жер банкін басқарған адал жер пайдаланушыларға қолданылмауға тиіс және олар үшін жерді ұзақ мерзімді жалға алуды ұзарту белгіленген шекті мөлшерден асатын жер телімдерінің бір бөлігін алып қоймай жүзеге асырылуға тиіс», - деп есептейді Талғат Жүнісов.

Депутат орта және ірі агроқұрылымдардың үлесіне егіс алқаптары мен астық өндіру көлемінің 60%-дан астамы тиесілі екенін атап өтті. Адал ауыл шаруашылығы құрылымдары топырақтың құнарлылығын қалпына келтіруге белсенді инвестиция салады, заманауи агротехнологияларды енгізеді, машина-трактор паркін жаңартады, ауыл шаруашылығы шикізатын өңдеуді игереді, жұмыс орындарын құрады.

«Олардан айтарлықтай шығындар инвестицияланған жер телімдерінің бір бөлігін алу, кем дегенде, әділетті емес», - деп қосты сенатор.

«Қолданыстағы кедергілерді уақтылы жою, атап айтқанда Үкіметтің қолданыстағы қаулысына тиісті толықтыру енгізу және ауыл шаруашылығы өндірушілеріне қойылған міндеттерді тиімді орындауға мүмкіндік беру және қысқа мерзімде жақын және алыс шетелдерге азық-түлік тауарларын жеткізу бойынша негізгі ойыншылардың бірі болу өте маңызды», - деп түйіндеді Талғат Жүнісов.