Қостанай облысында 14 шаруа қожалығына жинау жұмыстарына жеңілдетілген несие мақұлданды
Қостанай облысы әкімдігінің «Кең Дала 2» жеңілдетілген несие беру бағдарламасына қатысатын ауыл шаруашылығы өндірушілерінің тізімін қарау жөніндегі үйлестіру кеңесі 14 өтінімді мақұлдады. Агроөнеркәсіп кешендері егін жинау науқанын өткізуге жеңілдікті несие алады, деп хабарлады өңірдің Кәсіпкерлер Палатасы.
Палатаның мәліметінше, бүгінгі таңда өңірдің аграрийлері 5 млрд теңгеден астам өтінім берген. Бұл сома шаруаларға ЖЖМ мен қосалқы бөлшектерді сатып алуға, сондай-ақ 2024 жылғы егін жинауға тартылған қызметкерлерге жалақы төлеуге мүмкіндік беретін егін жинау жұмыстарына айналым қаражатын толықтыруға қарастырылған.
«Кең дала 2» – Аграрлық несие корпорациясының жаңа бағдарламасы. Қаржы ресурстары жеке капитал нарығынан тартылады. Бағдарлама бойынша қарыз алушылар жылдық 5% несие алады. Қарыз сомасының 85%-на «Даму» кәсіпкерлікті дамыту қоры кепілдік береді. Сонымен қатар, фермердің несиені тек АНК-нан ғана емес, несиелік серіктестіктер, екінші деңгейлі банктер, МҚҰ, аймақтық инвестициялық орталықтар және ӘКК арқылы алуға мүмкіндігі бар.
Қостанай облысы Кәсіпкерлер палатасының директоры Данияр Күзенбаевтың айтуынша, облыс аграрийлері салалық кеңес алаңдарында сауатты қаржылық қолдау ауыл шаруашылығы өндірушілеріне қолайсыз ауа райы мен ауыл шаруашылығы өнімдерінің бағасының ауытқуының салдарымен күресуге көмектесетінін бірнеше рет атап өткен.