Итальяндық компания Қазақстанда қызанақты өңдеуге 100 млн доллар инвестиция салады
TRAMITE Group итальяндық компаниясы қазақстандық шикізат негізінде қызанақты өңдеу бойынша кәсіпорын құруды жоспарлап отыр. ҚР ауыл шаруашылығы министрі Айдарбек Сапаров пен компанияның негізін қалаушы Джианантонио Трамет ынтымақтастық мәселелерін талқылады. Бұл туралы Ауыл шаруашылығы министрлігінің баспасөз қызметі хабарлады.
Джианантонио Трамет TRAMITE Group Қазақстан аумағында томат пастасы мен басқа да өнімдер өндірісін құруға мүдделі екенін атап өтті. Жыл сайын Италия 180 мың тонна томат пастасын импорттайды және компания осы импорттың бір бөлігін Қазақстанда қайта өңдеуге бағыттау мүмкіндігін қарастыруда.
Шардара өңірінде экспорттық агроөнеркәсіптік кластер құру жөніндегі жобаның бастамашысы болып табылатын қазақстандық «Agriqa Farms» ЖШС компанияның негізгі серіктесі болады.
22 га алаңда жылыжай кешенін салуды көздейтін жобаны іске асыру 2025 жылғы мамырда басталады. Жоба шеңберінде сондай-ақ қуаттылығы тәулігіне 3360 тонна шикізат болатын зауыт, қуаттылығы сағатына 30 тонна жоңышқа түйіршіктеу зауыты және тәулігіне 200 тонна жеміс-көкөніс шикізатын кептіру және мұздату жеміс комбинаты, 20 мың тоннаға жеміс-көкөніс қоймасы, 10 мың тоннаға салқындату комбинатын салу жоспарланған.
2026 жылдан бастап 8 мың га алаңда тамшылатып суаруды орнату жұмыстары басталады. Жобаға инвестициялардың жалпы көлемі 100 млн долларды құрайды.
«Біз қайта өңдеу бойынша ірі жобаларға мүдделіміз және оларды табысты іске асыру үшін жан-жақты қолдау көрсетуге дайынбыз», - деп атап өтті Айдарбек Сапаров.