Қазақстанда әлеуметтік маңызы бар тауарлардың тізімі кеңейтіледі

Үкімет азық-түлік бағасын бақылауды арттыру мақсатында әлеуметтік маңызы бар азық-түлік тауарларының тізбесін кеңейтуді талқылауда. Сауда министрлігі азық-түлік себетін талдаудың алдын-ала нәтижелерін ұсынды, деп үкіметтің баспасөз қызметі хабарлады.

«Барлық аймақтардағы азық-түлік инфляциясын талдау негізінде біз бағаның өсуіне ең көп ықпал ететін, бірақ әлеуметтік маңызы бар өнімдер тізіміне кірмейтін 30 өнімнің тізімін жасадық. Бұл әртүрлі ет түрлері, жас балық, алма, алмұрт, лимон, шай, ірімшік, суық ысталған скумбрия, банан, қызанақ, қияр және т.б. Олардың арасында импорттың үлесі жоғары тауарлар да, бағалары негізінен ай сайынғы, бірақ жылдық емес инфляцияға әсер ететін тауарлар да бар. Осы тізімнен біз әлеуметтік маңызы бар тізімге енгізілуі мүмкін 23 тауарды анықтадық. Енді бизнеспен ұсыныстарды талқылаймыз», — деді сауда және интеграцияның бірінші вице-министрі Айжан Бижанова.

Кәсіпкерлер үшін тізбені кеңейту белгіленген талаптардың сақталуын білдіреді: мәмілелердің ашықтығы, шарттарды ресімдеу, шот-фактураларды шығару және фискалдық түбіртектердің берілуі, сондай-ақ заңнамада белгіленген сауда үстемесінің 15%-дан аспауы.

Үкімет атап өткендей, бұл шаралар сұраныстағы азық-түлік айналымының ашықтығын қамтамасыз етуге және өнімсіз делдалдардың түпкілікті бағаға әсерін барынша азайтуға бағытталған.

Сауда министрлігінің мәліметтері бойынша, қазан айында азық-түлік инфляциясына ең көп үлес қосқандар қызанақ (15,8%), тартылған ет (3%), сүйексіз сиыр еті (2,2%), сүйекті жылқы еті (1,5%), қияр (7,4%), жас балық (2,6%), банан (2,8%) және басқа да азық-түлік өнімдері болды. Сонымен қатар, өткен жылдың алғашқы 10 айымен салыстырғанда қызанақ бағасы 36,6%-ға, ал қияр 43,4%-ға төмендеді.

Кеңес қорытындысы бойынша вице-премьер Серік Жұманғарин Сауда және интеграция министрлігіне бизнес-қоғамдастықпен, салалық қауымдастықтармен, «Атамекен» ҰКП-мен ұсынылатын әрбір тауарды талқылауды, импорт құрылымын қосымша талдауды тапсырды. Соңғы шешімдер барлық консультациялар аяқталғаннан кейін қабылданады.