Қазақстан Қытайда 125 млн долларға сауда келісімдеріне қол қойды
Циндаодағы сауда-экономикалық миссияның қорытындысы бойынша қазақстандық компаниялар қытайлық серіктестермен жалпы сомасы 125 млн долларға келісімдерге қол жеткізді. Келісімдер агроөнеркәсіптік кешен мен қайта өңдеу өнімдерін жеткізуді қамтиды және Қытай нарығына экспортты кеңейтуге бағытталған. Бұл туралы Сауда министрлігінің баспасөз қызметі хабарлады.
«Миссияға 25-тен астам қазақстандық компания қатысты. Негізгі назар қытайлық импорттаушылармен және дистрибьюторлармен тікелей B2B кездесулеріне аударылды. Қазақстандық тарап агроөнеркәсіптік кешен мен терең өңдеу өнімдерін ұсынды. Ұн, май-тоңмай өнімдері, бал, сүт өнімдері және кондитерлік өнімдер қытайлық бизнес өкілдерінің үлкен қызығушылығын тудырды», - деп атап өтті ведомствода.
Сапар аясында сауда министрі Арман Шаққалиев Шаньдун провинциясының басшылығымен және бизнес өкілдерімен кездесулер өткізді, онда тараптар өнім жеткізуді кеңейту және индустриялық кооперация мәселелерін талқылады.
Сауда министрлігінің мәліметінше, 2026 жыл Қытайда қазақстандық тауарлардың импорты жылы, ал Қазақстанда Қытайға экспорт жылы болып жарияланды.
Шаньдун провинциясы - дамыған өнеркәсіптік негізі және қуатты тұтыну нарығы бар Қытайдың ең ірі экономикалық аймақтарының бірі. QazTrade деректері бойынша 2025 жылдың қорытындысы бойынша Қазақстан мен Шаньдун арасындағы тауар айналымы 40%-дан астам ұлғайып, 2,2 млрд долларға жетті.