Қазақстандағы аграрлық жобалар жаңа қаржыландыру көзіне ие болады
ЕАЭО шеңберінде кооперациялық жобаларды қаржыландырудың жаңа тетігін Еуразиялық экономикалық комиссия (ЕЭК) іске қосады. «Атамекен» ҰКП алаңында өткен ЕЭК Алқа мүшесі және өнеркәсіп және агроөнеркәсіптік кешен министрі Гоар Барсегянмен кездесуде бизнес өкілдеріне қолдау көрсетілетін жобалар мен шарттар туралы ақпарат берілді.
«Атамекенде» айтылғандай, кооперациялық жобаларды қаржыландырудың бірегей тетігі жақын арада аграршыларға қолжетімді болады. Қаржылық жәрдемдесу жүйесін іске қосу осыған дейін өнеркәсіп саласында сынақтан сәтті өтті.
Гоар Барсегянның айтуынша, жаңа тетік шеңберінде ЕАЭО бюджетінен ұлттық банктердің негізгі мөлшерлемесінің 100% өтеледі. Бұл бизнеске несиеге қызмет көрсету шығындарын азайтуға мүмкіндік береді. Жобаға ЕАЭО-ның кемінде үш елінің кәсіпорындары қатысуы тиіс.
Жылына бір жоба үшін 350 млн Ресей рубліне дейін қарастырылған. Қолдау мерзімі — 5 жылға дейін. Қазіргі уақытта қорға шамамен 9 млрд рубль салынды, ал 2027 жылға қарай бұл сома 12-13 млрд рубльге дейін өседі.
Бағдарлама төрт негізгі бағытты қамтиды: өсімдік шаруашылығы, мал шаруашылығы, ауыл шаруашылығы өнімдерін өңдеу және агрологистика.
ЕАЭО-да қолдау алған алғашқы кооперациялық жоба Қазақстанда Kazrost Engineering Ltd ЖК негізінде ауыл шаруашылығы техникасын шығаруды ұйымдастыру болды. Жоба жылына жоспарланған шығару көлемі 700-ден 1000 бірлікке дейін астық жинайтын комбайндар кабиналарының өндірісін игеруді көздейді. Қазақстанның үлесі 15% құрайды. Кооперацияға Ресей («Ростсельмаш» ЖШҚ) және Беларусь («КУВО» ЖПП, «Салео» ЖШҚ) қатысады, олардың жиынтық үлесі кабинаның өзіндік құнының 5%-дан астамын құрайды.
ҚР ауыл шаруашылығы вице-министрі Ермек Кенжеханұлы жаңа бағдарлама Қазақстандағы қолданыстағы мемлекеттік қолдау шараларын алмастырмайтынын, бірақ қаржыландырудың қуатты қосымша көзі болып табылатынын атап өтті.
«Бизнес Қазақстан және Еуразиялық экономикалық одақ бюджеттерінен төлемдерді біріктіре алады. Бұл Одақ ішіндегі ресурстар мен нарықтарды бөлу арқылы бірегей қаржылық қауіпсіздікті қамтамасыз етеді», - деп түйіндеді вице-министр.