Жамбыл облысында жүгеріні терең өңдеу зауыты жұмысын бастады

Shengtai Biotech Co., Ltd (Fufeng Group) компаниясы Жамбыл облысының Шу ауданындағы Jibek Joly АЭА аумағында жүгеріні терең өңдеуге бағытталған өнеркәсіптік парк салуда. Жоба үш кезеңде жүзеге асырылуда, бірінші кезеңі аяқталды. Бұл туралы облыстық әкімдіктің баспасөз қызметі хабарлады.

Жобаға инвестициялардың жалпы көлемі 1,5 млрд долларды құрайды. 400 га аумақта орналасқан кәсіпорын аминқышқылдарын өндіруге маманданған. Негізгі өнімдердің қатарына изолейцин, лейцин, валин, треонин, глутамин және цитруллин жатады.

«2026 жылғы 21 наурызда кәсіпорында алғашқы өнім - изолейцин және лейцин алынды (техникалық режимде). Бұл Қазақстан үшін жаңа бағыт, және өнімдер елімізде және тұтастай алғанда Орталық Азияда алғаш рет шығарылып отыр. Бұл адам ағзасына қажетті маңызды тармақталған тізбекті аминқышқылдар (BCAA). Қазіргі уақытта өндірісті толық қуатқа шығару бойынша жұмыстар жүргізілуде», - деп нақтылады әкімдікте.

Толық іске қосылғаннан кейін зауыт жыл сайын 3 млн тоннаға дейін жүгеріні өңдей алады және 1,7 мыңға жуық жаңа жұмыс орындарын құруды қамтамасыз етеді.

Өнім Орталық Азия, Еуропа, Африка және Америка елдеріне экспортталады деп жоспарлануда.