Президент Сапархан Омаровтың отставкаға кетуі туралы жарлыққа қол қойды

ҚР Президенті Қасым-Жомарт Тоқаев Сапархан Омаровты ҚР Ауыл шаруашылығы министрі қызметінен босату туралы жарлыққа қол қойды. Бұл туралы Ақорданың баспасөз қызметі хабарлады.

Бүгін Үкіметтің кеңейтілген отырысында Қасым-Жомарт Тоқаев Сапархан Омаровтың елде жем-шөп тапшылығы мен малдың жаппай қырылуына жол берілгендігіне байланысты отставкаға кету керектігін мәлімдеді.

Сапархан Омаров Ауыл шаруашылығы министрлігін 2019 жылдың ақпан айынан бастап басқарды.

Бұған дейін ол бағалы қағаздар жөніндегі ұлттық комиссияда, Азық-түлік келісім-шарт корпорациясында, ҚР Парламентінің шаруашылық басқармасында түрлі лауазымдарда жұмыс істеді.

ҚР Президенті Әкімшілігінің мемлекеттік инспекторы, Республикалық бюджеттің атқарылуын бақылау жөніндегі есеп комитетінің мүшесі, ауыл шаруашылығы вице-министрі, ҚР Парламенті Мәжілісінің депутаты болып қызмет атқарды.