Қазақстан мен Тәжікстан бірлескен сауда кәсіпорнын құруда

QazTrade сауда саясатын дамыту орталығы мен Тәжікстан Республикасы Үкіметінің жанындағы экспорт агенттігі Астанадағы бизнес-форумда "ТәжҚазТрейд" бірлескен кәсіпорнын құру жөніндегі жобаның тұжырымдамасына қол қойды. Бұл туралы QazTrade хабарлады.

"Қазақстан ішіндегі әлеуметтік маңызы бар тауарлардың бағасын тұрақтандыру және қазақстандық экспортты ілгерілету үшін біз тәжік әріптестерімен бірлескен кәсіпорын ашамыз. Бұл компанияның міндеті екіжақты ынтымақтастықты арттыру, кәсіпкерлерге көтерме-тарату орталықтарын, қоймаларды құруға жәрдемдесу, сондай-ақ қазақстандық өнімдерді Тәжікстанға экспорттау бағыттарын жолға қою болады", - деді QazTrade бас директоры Нұралы Бөкейханов.

Қазақстан-тәжік бизнес-форумы алаңында тараптар 1,8 млрд доллардан астам сомаға 39 коммерциялық келісімшарттар мен келісімдер жасасты.

Қазақстан Тәжікстанға тамақ өнімдерін, сондай-ақ локомотивтерді, рельстерді, автомобильдер мен көлік құралдарын экспорттайды. Тәжікстан Қазақстан нарығына кендер мен концентраттарды, жеміс-көкөніс өнімдерін жеткізеді.

Бұған дейін QazTrade Өзбекстанмен бірлескен экспорттық-импорттық компания – UZKAZTRADE құрған болатын. Пәкістанмен бірге осындай кәсіпорын ашуды жоспарлап отыр.