Қазақстанда тұқым шаруашылығында IT бақылау жүйесі құрылады

Қазақстанда Президенттің тапсырмасы бойынша селекция мен тұқым шаруашылығын дамыту жоспары әзірленді. Оның ішінде тұқымның сапасын бақылайтын және сертификаттайтын арнайы орган құрылуда. Бұл туралы бүгін Сенат отырысында сөйлеген сөзінде бірінші вице-премьер Роман Скляр мәлімдеді.

"Келесі жылы біз өсімдіктердің жаңа сұрыптарын қорғау жөніндегі халықаралық конвенцияға қосыламыз. Қазір біз тұқым отырғызу сапасын бақылайтын IT жүйесін құрып жатырмыз. Осының арқасында селекция мен тұқым базасы нығаяды және біз импортқа тәуелді болмаймыз", - деді Роман Скляр.

Ол сондай-ақ биыл Қазақстанда соңғы 10 жылдағы ең жоғары өнім жиналғанын атап өтті. 23 млн тоннаға жуық дәнді және бұршақты дақылдар бастырылды, бұл өткен жылмен салыстырғанда 27% - ға артық. Бидай өнімі 30% - ға өсті. Көкөніс дақылдарының мол өнімі де алынды.

"Өткен жылмен салыстырғанда орташа өнімділік 11% - ға өсті", - деді вице-премьер.