Қазақстанда 2,5 млн тонна астық туралы дұрыс емес ақпарат анықталды

Ауыл шаруашылығы министрлігі елдегі ауыл шаруашылығы өнімдерінің қорларын тексеруді және ресми статистикамен сәйкессіздіктерді анықтауды жалғастыруда. Бұған дейін мал шаруашылығында осындай жұмыстар жүргізілген болатын, нәтижесінде 2 млн бас ІҚМ, 3,2 млн бас қой мен ешкі, сондай-ақ 3 млн тонна жоқ сүт есептен шығарылды. Бұл туралы Үкімет отырысында вице-премьер Серік Жұманғарин хабарлады.

Вице-премьердің айтуынша, есептен шығарылған малдың негізгі үлесі жеке қосалқы шаруашылықтарға тиесілі.

«Қосымша 2,5 млн тонна дәнді дақылдарды, 2 млн тоннаға дейін картопты және 300 мың тоннадан астам пиязды есептен шығару жоспарлануда. Қайталанған жалған тіркеулерді болдырмау үшін ауыл шаруашылығы өнімдерін есепке алу мен қадағалаудың, сондай-ақ субсидиялар берудің ақпараттық жүйелері жетілдірілуде», - деді Серік Жұманғарин.

Ол сондай-ақ шаруа және фермер қожалықтарын және барлық субсидия алушыларды статистикалық есептілікті тапсырумен жүз пайыз қамтуды қамтамасыз ету жоспарланып отырғанын атап өтті.