Қызылорда облысының әкімдігі мал шаруашылығы үшін қосымша қаржы сұрауда

Мал шаруашылығы саласына мемлекеттік қолдау көрсету ережесінің өзгеруіне байланысты Қызылорда облысының әкімдігі аймақтағы саланы қосымша қаржыландыруға бюджеттік өтінім берді. Бұл туралы әкімнің баспасөз қызметінен хабарлады.

"Қазіргі уақытта ҚР АШМ мал шаруашылығы саласын субсидиялаудың жаңа Ережесін бекітті.  Аталған Ережеде асыл тұқымды қойды сатып алуға арналған субсидия көлемін  ұлғайту және селекциялық, асыл тұқымдық жұмыстарды жүргізу тәртібі сияқты кейбір өзгерістер енгізілді. Ережеге жаңа өзгерістер енгізілуіне байланысты, Қызылорда облысының әкімдігі тарапынан ҚР АШМ-ға республикалық бюджеттен қосымша қаражат бөлу туралы өтінім ұсынылды», - деп әкімдіктен хабарлады.

Баспасөз қызметі мәлімдегендей, бұл өңірде инвестициялық жобаларды мемлекеттік қолдау мен жеңілдікпен несие берудің арқасында бүгінгі таңда мал шаруашылығы қарқынды түрде өсуде. Ағымдағы жылдың 6 айында мал шаруашылығы өнімінің көлемі 23,1 млрд теңгені құрады, бұл өткен жылдың көрсеткіштерінен 2,2% - ға артық. Олардың ішінде жылқы еті мен құс өнімдерін ерекше атап өтуге болады.

Мал шаруашылығын мемлекеттік қолдау мақсатында 2020 жылға облыстық бюджеттен 2 432,1 млн теңге бөлінді, бүгінгі таңда 625 шаруашылыққа 1500 млн теңге субсидия төленді.

Сондай-ақ, ағымдағы жылы «Сыбаға» бағдарламасы аясында облысқа шетелден 288 бас асыл тұқымды ірі қара мал әкелінді. Оның 80 - і «Қуанышбаев», 128 - і «Парадин», 80-і «Ерасыл» жеке кәсіпкерлеріне берілді. Сонымен қатар, республика көлемінде 6105 бас қой сатып алу жұмыстары жүргізілуде.